अभिनेता रमित ढुंगानाको निर्माण एवं निर्देशन रहेको फिल्म 'नमेटिने घाउ' को प्रदर्शन मिति तोकिएको छ।
सामाजिक कथामा बनेको यो फिल्मलाई भदौ ७ गतेदेखि प्रदर्शनमा ल्याइने भएको निर्माता एवं निर्देशक ढुंगानाले बताए।
'पहिलेदेखि नै त्यही डेट सोचिरहेको हो। तर, प्रधानमन्त्रीज्यूको डबिङ नसकिएकाले घोषणा गरेका थिएनौं,' ढुंगानाले भने, 'हिजो उहाँको समय पायौं। त्यसपछि रिलिज मिति घोषणा गरेका हौं।'
यो फिल्ममा केपी शर्मा ओलीले प्रधानमन्त्रीको भूमिका निर्वाह गरेका छन्।
विभिन्न समय र स्थानमा भएका एसिड आक्रमणको सत्य घटनाका आधारित रहेर फिल्म बनेको हो।
फिल्मको कथा शिवम् अधिकारीले लेखेका हुन्।
फिल्ममा मुस्कान खातुन, प्राप्ति पौडेल, इभा गिरी, कमल देवकोटा, सन्दीपबाबु लोहनी, रचना गौतम, प्रभात पाल ठकुरी, आरती आचार्य, अखिल बजगाईं, उपेक्षा न्यौपाने, क्रान्ति शाह, वीरेन्द्रसिंह कुसवाह, लालना चिमोरिया, स्वस्तिमा कार्की, लिजा कोरानी, एलिसा गुरूङ, सुरवीर पण्डित, सुनिल कटुवाल, विशाल देवकोटा, आरजु अधिकारी, आरजु लेखक लगायतले अभिनय गरेका छन्।
फिल्ममा पूर्व प्रधानमन्त्री माधवकुमार नेपाल, सांसद ज्ञानेन्द्र शाहीको समेत अभिनय छ।
