जितु नेपाल र नीति शाहको शीर्ष अभिनय रहेको फिल्म 'ज्वाइँ साब' को गीतमा गायक निशान भट्टराई र गायिका समीक्षा अधिकारीले स्वर दिएका छन्।
फिल्मको हालै रेकर्डिङ भएको रोमान्टिक गीत 'कसम बत्तीको' मा उनीहरूले स्वर दिएका हुन्। अर्जुन पोखरेलको संगीत रहेको गीतका शब्द यादव लम्सालका हुन्।
यो गीतमा फिल्मका मुख्य दुई कलाकार जितु र नीतिलाई फिचरिङ गरिने निर्देशक बसन्त निरौलाले बताए।
यो फिल्मको यही एउटा गीतको छायांकन बाँकी छ। हाल पोष्ट प्रोडक्सनको काम भइरहेको फिल्मको प्रदर्शन मिति चाँडै नै तय गरिने निर्माणपक्षले जनाएको छ।
कमेडी जनरामा रहेर निर्माण भएको यो सामाजिक फिल्ममा बुद्दि तामाङ, शिशिर वाङ्देल, प्रकाश घिमिरे, रमेश वुढाथोकी, निमा पाण्डे, हिमेश पन्त, शिवहरि वैरागी, राजेन्द्र नेपाली, कविता आले, इशान राउत (जिरे), शिवु पाण्डे लगायतका कलाकारहरूको अभिनय छ।
राजकुमार पण्डितको प्रस्तुतिमा तयार भएको फिल्ममा मीनादेवी खड्का, सौगात पण्डित र पदमलाल तामाङको लगानी छ।
विजय बस्याल कार्यकारी निर्माता रहेको फिल्ममा सविन अधिकारीको कथा, शंकर धितालको पटकथा तथा संवाद छ। रेड आई फिल्मस्ले ओएसआर डिजिटल र मौसम फिल्मससँगको सहकार्यमा ज्वाइँ साब निर्माण गरेको हो।
फिल्मलाई श्याम तामाङले छायांकन गरेका हुन्। फिल्ममा जितु र नीतिको जोडीलाई दर्शकले विशेष रुपमा देख्न पाउने निर्देशक निरौलाले बताए।
