निर्माणको तयारीमा रहेको फिल्म 'माइतीघर' को शीर्ष गीतमा चर्चित बलिउड गायिका संजीवनीले स्वर दिने भएकी छन्।
'वसन्त नै बस्न खोज्छ यहाँ...' बोलको गीतमा उनले स्वर दिने भएकी हुन्।
फिल्मका निर्माता रोहित अधिकारीका अनुसार आगामी साता मुम्बईको स्टुडिओमा संजीवनीले गीत रेकर्ड गराउनेछिन्।
यसअघि 'माइतीघर' नाममा बनेको फिल्मको उक्त चर्चित गीतमा आशा भोसलेले स्वर दिएकी थिइन्।
'पहिलेको फिल कायम होस् भनेर संजीवनीको स्वरमा रेकर्ड गराउने भएका हौं,' अधिकारीले भने। संजीवनीले यसअघि धेरै नेपाली गीतमा स्वर दिएकी छन्।
गीतमा जयदेवकै संगीत र किरण खरेलको शब्द यथावत रहनेछ भने रिकेश गुरूङको एरेन्ज रहनेछ। गीतका लागि यसैसाता गीतकार किरण खरेलसँग प्रतिलिपि अधिकारका लागि सम्झौता भएसँगै संजीवनीको स्वरमा रेकर्ड गराउने फाइनल भएको अधिकारीले बताए।
संजीवनीले यसअघि 'पुरानो हुँदैन माया, डाँडा पाखा छहराले, आँखामा आउने तस्बिर' जस्ता हिट नेपाली गीतमा स्वर दिएकी छन्।
पुरानो नाम सापटी लिएर निर्माण हुन लागेको 'माइतीघर' मिलन तामाङले निर्देशन गर्नेछन्। कथा चन्द्रबहादुर दोङको रहनेछ। पटकथा र संवाद रामशरण पाठकले लेखेका छन्। फिल्मको निर्माता रविन शेरचन र धिरज तामाङ हुन् भने कार्यकारी निर्मातामा ईश्वर श्रेष्ठ र निरज कटुवाल छन्।
फिल्ममा केदार घिमिरे (माग्ने बुढा), प्रकाश सपुत, उपासनासिंह ठकुरी, बुद्धि तामाङ, दिकिला शेर्पाले शीर्ष भूमिकामा अभिनय गर्नेछन्।
अहिले स्क्रिप्ट लक गर्ने अन्तिम तयारी रहेको बताउँदै निर्माता अधिकारीले चैतदेखि छायांकन सुरू गर्ने बताए।
'यसपटक स्क्रिप्ट, कलाकार र गीतसंगीतमा विशेष ध्यान दिनेछौं,' अधिकारीले भने, 'मेकिङमा पनि कुनै कम्परमाइज गर्नेछैनौं। प्रचारप्रसार पनि विगतमा भन्दा अझ तीव्र गर्नेछौं।'
फिल्म आउँदो दसैंको फूलपातिमा रिलिज हुनेछ।
