बलिउड स्टारहरूसँग फोटोमा देखिएर चर्चामा आएका ओरी अहिले काठमाडौंमा छन्।
सहयोगीसहित काठमाडौं आएका उनको आगमनबारे खुलाइएको छैन। अहिले उनी नक्सालको हिल्टन होटलमा बसिरहेका छन्। होटलको सामाजिक सञ्जालमा ओरीलाई स्वागत गरेका तस्बिर र भिडिओ पोस्ट गरिएको छ। होटलमा उनलाई खादा र नेपाली टोपी लगाएर स्वागत गरिएको थियो।
ओरी बलिउडको पार्टीमा देखिँदै आएका छन्। पार्टीमा मात्रै नभइ ओरी अभिनेत्रीहरूसँग अन्य कार्यक्रममा पनि देखिरहेका छन्। ओरीको पुरा नाम ओरहान अवत्रामणि हो।
ओरी मुम्बईको सामाजिक कार्यकर्ता हुन्। उनी अभिनेत्री सारा अली खानसँगै कोलम्बिया युनिभर्सिटीमा पढाइ गरेका थिए।
उनी बलिउडको 'बिएफएफ' को रूपमा पनि चिनिन्छन्। उनी पछिल्लो समय आफ्नो बोल्ड फेसन छनोट र फ्यान फलोइङको कारण चर्चामा छन्।
उनी मुम्बईको व्यवसायी पनि हुन्। रिलायन्स इन्डस्ट्रिज लिमिटेड चेयरपर्सन अफिसमा उनी विशेष परियोजना प्रबन्धकको रूपमा काम गर्छन्। यसबाहेक उनले न्यूयोर्कको पार्सन स्कुल अफ डिजाइनबाट फाइन आर्ट्स र कम्युनिकेशन डिजाइनमा स्नातक गरेका थिए।
