दक्षिण भारतीय अभिनेत्री नयनताराविरूद्ध अभिनेता धनुषले लिगल नोटिस पठाएका छन्।
नयनतारा आफ्नो जीवनमाथि आधारित डकुमेन्ट्री फिल्म 'नयनतारा बियोन्ड द फेयरीटेल' लिएर आउँदैछिन्। यो डकुमेन्ट्री फिल्म नेटफ्लिक्समा रिलिज हुनेछ। हालै यसको ट्रेलर सार्वजनिक भएको थियो। सार्वजनिक ट्रेलरमा तमिल फिल्म 'नानुम राउडी धान' को म्यूजिक प्रयोग गरिएको छ।
फिल्म 'नानुम राउडी धान' सन् २०१५ मा रिलिज भएको थियो। फिल्ममा नयनतारा र विजय सेतुपतिले अभिनय गरेका थिए। यसको निर्माता दक्षिण भारतीय अभिनेता धनुष थिए। नयनताराले आफ्नो डकुमेन्ट्री फिल्ममा 'नानुम राउडी धान' को गीत र दृश्य प्रयोग गरेपछि लिगल नोटिस पठाएका हुन्।
उक्त कुरा नयनतारा स्वंमले खुलासा गरेकी हुन्। उनले धनुषलाई एक पत्र लेख्दै आफूले निकै मुस्किलले डकुमेन्ट्री तयार पारेको बताएकी छन्। उनले धनुषसँग लामो समयदेखि 'नानुम राउडी धान' को गीत प्रयोग गर्न अनुमति मागिरहेको खुलासा गरेकी छन्। तर धनुषले उक्त प्रस्ताव अस्वीकार गरेका थिए।
यो डकुमेन्ट्री फिल्म १८ नोभेम्बरदेखि नेटफ्लिक्समा रिलिज हुनेछ।
