र्यापर हाकिम र गायक ब्रिजेश श्रेष्ठले संयुक्त प्रस्तुतिमा र्याप गीत 'चिसो चिसो हावाले' सार्वजनिक गरेका छन्।
बिहीबार काठमाडौंमा एक कार्यक्रमकाबीच सार्वजनिक गीतको अडिओ गायक श्रेष्ठले तयार गरेका हुन्।
गीतको भिडिओमा समेत गायक श्रेष्ठ, र्यापर हाकिम, मोडल युकी, एलिस बहादुर सिंह लगायतले अभिनय गरेका छन्।
सार्वजनिक गीतले त्रिकोणात्मक प्रेमलाई दर्शाउने गायक श्रेष्ठले बताए। अडिओ र भिडिओ दुवै सशक्त बनाउन मेहनत गरिएको उनले बताए।
गीत सार्वजनिक समारोहमा उपस्थित र्यापर गिरिश खतिवडाले र्यापको माहोल राम्रो बनिरहेको देख्दा खुसी लागेको बताए।
'यसरी र्यापर अगाडी आएर आफूलाई चिनाउम्दै गीत सार्वजनिक गर्दा निकै खुसी लाग्छ। यो गीत अडिओ र भिडिओ पनि राम्रो बनेको छ। यस्तै कार्यक्रम गरेर यस्ता गतिविधि बढाउनुपर्छ। अहिलेको नयाँ पुस्ताले समेत र्यापलाई राम्रोसँग अगाडी बढाएको देख्दा खुसी छु', र्यापर खतिवडाले भने।
र्यापर हाकिमले र्यापरको भेटघाटका लागि पनि यस किसिमको कार्यक्रम आयोजना गरिएको बताए।
कार्यक्रममा शुभकामना दिन र्यापर मानस घले पनि उपस्थित थिए। विवेक मगरको छायांकन र निर्देशन रहेको गीतको भिडिओ नेस स्टुडिओमार्फत सार्वजनिक गरिएको छ। र्यापर हाकिमको 'राक्षस', 'चोरीदेउ लौन मलाइ' र ब्रिजेशको 'रङग', 'ओ मईचा','डल्ली' लगायतका गीत चर्चित छन्।
