उद्योग विभागबाट अनलाइन प्रक्रिया शुरू गरेसँगै वैदेशिक लगानीमा वृद्धि हुँदै गएको विभागले जनाएको छ ।
उद्योग विभागले माघ २ गतेदेखि अनलाइन प्रक्रियाबाट विदेशी लगानी स्वीकृत, भिसा सिफारिश र उद्योग दर्ता शुरू गरेसँगै विदेशी लगानी बढेको हो ।
विभागले सोमबार काठमाडौंमा आयोजना गरेको ‘अनलाइन प्रक्रिया र प्रत्यक्ष विदेशी लगानी’ सम्बन्धी सेवाग्राहीसँग गरेको छलफलमा उद्योग मन्त्रालयका सचिव शंकरप्रसाद कोइरालाले मुलुकमा औद्योगिक वातावरण सिर्जना गर्न नीतिगत, संस्थागत र प्रक्रियागत सुधार भइरहेको बताए।
‘औद्योगिक व्यवसाय ऐन, विशेष आर्थिक क्षेत्र ऐन, कम्पनी ऐन, पेट्रोलियम अन्वेषण नीति, खानीसम्बन्धी नीतिलगायतले देशमा औद्योगिक वातावरण निर्माण गर्न सहयोग पुगेको छ,’– सचिव कोइरालाले भने । प्रत्यक्ष विदेशी लगानीसम्बन्धी विधेयक निर्माण गर्न मन्त्रालय लागेको उनको भनाइ थियो ।
उद्योग विभागका महानिर्देशक शंकर अर्यालले अनलाइन प्रक्रियाले उद्योग दर्ता प्रक्रियामा सहज भएकाले यसलाई अझ सहज बनाउन विभाग लागेको बताए । ‘उद्योग दर्ता सहज गराउन डिजिटल हस्ताक्षर लागू गर्ने प्रक्रियामा विभाग लागेको छ,’–महानिर्देशक अर्यालले भने ।
नेपाल उद्योग वाणिज्य महासंघ, उद्योग समिति संयोजक अन्जन श्रेष्ठले दर्ता प्रक्रिया सहज भएसँगै उद्योग क्षेत्रमा लगानी बढेको भन्दै मुलुकमा रोजगारीको वातावरण सिर्जनामा यसले सहयोग पुग्ने बताए ।
नेपाल उद्योग परिसंघका उपाध्यक्ष राजेशकुमार अग्रवालले समयको परिवर्तनसँगै उद्योग विभागले पनि अनलाइन सेवाको थालनी गरेर राम्रो काम गरेको भन्दै क्रमशः अरु विभागलाई पनि अनलाइन प्रक्रियामा लानुपर्ने बताए ।
विभागका उपसचिव दुर्गाप्रसाद भुसालले सेवाग्राहीमार्फत उद्योग दर्तासम्बन्धी सम्पूर्ण कागजात प्राप्त गर्नसके एकैदिनमा उद्योग दर्ता गर्न सकिने बताए ।
कार्यक्रममा सेवाग्राहीले विभाग अनलाइनमा गए पनि छिनछिनमा बिग्रने सर्भरले उद्योग दर्ता प्रक्रियामा ढिलाइ हुन गएको भन्दै उक्त सेवालाई छिटो, छरितो बनाउन सुझाव दिएका थिए । रासस
-1746009348.jpg)
