केही बढी कमाइका लागि ‘सुन’ फल्ने गाउँ र आफ्नो मातृभूमिसमेत छाडेर हिँड्नेलाई परिवारसँगै गाउँमै बसेर काम गरे प्रशस्त पैसा र आत्मसन्तुष्टि कमाउन सकिन्छ भन्ने उदाहरण बनेका छन् मकवानपुरका एक युवा।
उनी हुन् भीमफेदी गाउँपालिका–५ छबेलीका ३६ वर्षीय दीपक पुडासैनी।
कृषि उद्यमी, कुखुरापालक, बङ्गुरपालक, हरितगृह मिस्त्री, कम्प्युटर प्रशिक्षक, कम्प्युटर मेकानिक, पावर टिलर चालक, पावर टिलर मेकानिक, कृषि प्रशिक्षकजस्ता धेरै काममा दक्ष मात्र होइन, ती सबै कामलाई पेसाका रूपमा उनले अंगालेका छन्।पुडासैनीको मासु पसल पनि छ। जहाँ उनले आफैंले पालेका कुखुरा काटेर बेच्छन्।
पुडासैनीसँग प्रशस्त जग्गा, जमिन छैन तर पनि ‘खाने मुखलाई जुंगाले छेक्दैन’ भनेझैं उनको कृषिमा क्रान्ति गर्ने रहरलाई जग्गा अभावले रोकेन।
आफ्नो तीन रोपनी र थप १५ रोपनी जमिन भाडामा लिएर पुडासैनीले मौसमअनुसारका तरकारी उत्पादन गरी वार्षिक २५ लाख रुपैयाँसम्मको कारोबार गर्छन्।
आम्दानीमध्ये खर्च कटाएर मासिक ६० देखि ७० हजार रुपैयाँसम्मको बचत हुने बताउँदै उनी मौसम, बजार र अन्य केही कुराले साथ दिए त्यो आम्दानी बढ्न पनि सक्ने उल्लेख गरे।
‘समय र मौसमको ख्याल गर्न चुक्यो भने घाटा पनि बेहोर्नुपर्ने रहेछ। बजारमा कुन महिना के तरकारी निकाल्दा भाउ पाउन सकिन्छ भन्ने अनुमान भएन भने उत्पादनले मूल्य नपाउन सक्छ’, उनी भन्छन्।
पुडासैनीका सफा टनेलभित्रका सप्रिएका बिरूवा अनि लटरम्म फलेका तरकारी र पाकेका गोलभेंडाले समृद्ध नेपालको मूल आधार कृषि नै हो भनेझैं गरी लोभ्याएका छन्।
अनि त्यहाँ खनजोत र गोडमेल गरिरहेका उनलाई देखेपछि लाग्छ कृषिजति सम्मानित अरू पेसा नै छैन।
पुडासैनीकी श्रीमती दीपिका पनि टनेल खेतीबाट सन्तुष्ट छिन्।
छ–सात वर्षदेखि नै आफूहरूले तरकारी खेती गर्दै आइरहेको भए पनि टनेलमा रोग कम लाग्ने पानी, हावाहुरी तथा सामान्य असिनाबाट समेत जोगाउन सकिने र तापक्रम व्यवस्थापन गर्न सहज हुने उनको भनाइ छ।
गोडमेल गर्न, मलखाद हाल्न, चिस्यानको व्यवस्थापन गर्न, उत्पादन टिप्नलगायत धेरै काम गर्न सजिलो हुनाका साथै बीउबिजन मललगायतको आकलन गर्न पनि सजिलो भएको अनुभव दीपिकासँग छ।
पत्रकारितामा स्नातक गरेका तथा कम्युटरको प्रशिक्षक प्रशिक्षण गरी कम्प्युटर शिक्षालय सञ्चालन गरेका पुडासैनीले जीवनमा नगरेका काम थोरै मात्रै बाँकी होलान् तर उनलाई आत्मसन्तुष्टिसँगै मनग्य आम्दानी दिने पेसा भने कृषि बन्न पुग्यो।
थोरै कुखुरा पालेर सुरू भएको पुडासैनीको कृषिकर्म आज देशमा ‘केही छैन, केही गर्न सकिन्न र केही पनि हुन्न भन्ने जमातका लागि यो देशमा सबैथोक छ तर, जाँगर र लगन आवश्यक छ भन्ने’ गतिलो उदाहरण बन्न पुगेको छ।
पुडासैनीले विभिन्न प्रकारका तरकारी तितेकरेला, काउली, बन्दा, गाँठेकोभी, गोलभेँडा, भेडे खुर्सानी, गाँजर, माछे खुर्सानी, काक्रोसँगै दैनिक सयौं किलोग्राम च्याउ उत्पादन गर्छन्।
ब्रोइलर कुखुराको संख्या घटाएको कारण आफैंले खोलेको मासु पसलमा काटेर र एक–दुइटा कुखुरा चाहिने स्थानीय ग्राहकलाई मात्र बेच्छन्। यसो गर्दा मूल्य पनि बढी नै आउँछ। पुडासैनी कुनै पनि काम सानो हुन्न भन्ने मान्यता राख्छन्। उनी हाते ट्र्याक्टर (पावर टिलर) लिएर स्थानीयवासीका खेतबारी प्रतिघण्टा ज्याला लिने गरी जोतिदिने पनि गर्छन्, कसैको हाते ट्र्याक्टर बिग्रिए बनाउने काम पनि गर्छन्, निश्चित रकम लिएर हरितगृह (टनेल) बनाइदिने तथा प्रशिक्षण दिने कामसमेत गर्छन्।
उनी कम्प्युटर प्रशिक्षक तथा मेकानिक्स पनि हो। समय मिलेसम्म पुडासैनी स्थानीयवासीका कम्प्युटर मर्मत गर्न पनि पुग्छन्।भीमफेदीमा पहिलो कम्प्युटर प्रशिक्षण केन्द्र तथा साइबर उनकै थियो। जुन हाल पनि अलिअलि चल्दै छ।
कृषि उत्पादनमा लागेर राम्रै आम्दानी गरिरहेको भए पनि केही थप व्यवस्था राज्यका तर्फबाट भइदिने हो भने अझै आम्दानी बढाउन सकिने पुडासैनी बताउँछन्।
बजार अहिले पनि बिचौलियाको कब्जामा रहेको, आफ्नो उत्पादनको मूल्य व्यापारीले नै तोक्ने गरेको, सुरक्षित भण्डारणका लागि शीतभण्डार अभाव रहेको आदि उनले झेलेका समस्या हुन्।
मल, बीउ तथा अन्य कृषि सामग्रीको मूल्यको नियमन तथा नियन्त्रण गर्नुपर्ने, मल, बीउ आदि सहज रूपले उपलब्ध गराउनुपर्ने लगायत माग पुडासैनीले भेटे जति निकायमा राख्ने गर्ने रहेछ तर सबैतिरबाट आश्वासन आए पनि कार्यान्वय भने सन्तोषजनक नभएको उनको गुनासो छ।
अर्को महत्वपूर्ण कुराचाहिँ नेपालमा बालीनालीमा लाग्ने रोग तथा कीराफट्याङ्ग्रा नियन्त्रणमा गहिरो अनुसन्धान हुन नसकेकामा आफूलाई दुःख लाग्ने गरेको पुडासैनी बताउँछन्।
नेपालका रैथाने च्याउ अनुसन्धान गरेर त्यसको बीउ उत्पादन गर्ने र व्यावसायिक खेती गर्ने हो भने मनग्य आम्दानी गर्न सकिनेमा त्यसो हुन नसकेको पनि उनी बताउँछन्।
‘उहाँ मेहनतको पर्याय हो, कामप्रति मरिहत्ते गर्ने बानीले पुडासैनीलाई सफल बनाउँदै छ’, भीमफेदी गाउँपालिकाका पूर्वउपाध्यक्ष पार्वती राना भन्छन्।
पुडासैनीको मेहनतको कदर गर्दै आफ्नो कार्यकालमा गाउँपालिकाले कृषि प्रवर्द्धनमा सहयोग गरेको उनी उल्लेख गर्छन्।
कृषि व्यवसाय गरेर प्रशस्त आम्दानी गर्न सकिन्छ भन्ने उदाहरण बनेका पुडासैनीको कामप्रति उनका साथीभाइ पनि खुसी छन्। पुडासैनीसँग टनेलमा भेटिएका स्थानीय बिसु सुनार आफू पुडासैनीको काम देखेर प्रभावित भएको बताउँछन्।
उनले कृषिबाट मनग्य आम्दानी गरिरहेका छन्।
‘राम्ररी लाग्ने हो भने कृषिमा प्रचुर सम्भावना रहेछ भन्ने उदाहरण देखाउनुभएको छ’, सुनार भन्छन्।
