एक धर्को सिन्दुरको लागि कोही
आफ्नो मूल्यवान् जीवन बेच्छन्
रंगीन जिन्दगी बिताउन कोही
त्यै धर्को अडिने सिउँदो किन्छन्
यहाँ सिन्दुरको महत्व जीवन बेच्नेलाई थाहा होला
जीवनको महत्व चैं सिउँदो किन्नेलाई थाहा होला कि नहोला?
कसैको अलिकति मुस्कान किन्न यहाँ
कोही आफ्ना सपनाको घाँटी रेट्छन्
कोही आफ्नो सपनामा गहना थप्न यहाँ
नक्कली मधुर मुस्कान बेचिदिन्छन्
यहाँ सपनाको घाँटी रेट्नेलाई त मुस्कानको मूल्य थाहा होला
नक्कली मुस्कान बेच्नेलाई सपनाको मूल्य थाहा होला कि नहोला ?
अलिकति पैसा किनेर इच्छा जमाउन
कोही आफ्ना रगत पसिना बेच्छन्
कोही आफ्ना पैसाको चाङ-चाङ बढाउन
तिनैका रगत र पसिना किन्छन्
यहाँ पैसाको महत्व अपूरा इच्छालाई थाहा होला
त्यो चाङ बढाउनेलाई पसिनाको मोल थाहा होला कि नहोला?
शिक्षा किनेर शिक्षित बन्न बनाउन
कोही आफ्ना सम्पत्ति र सपना बेच्छन्
कोही भने आफ्नै धन र चाहना किन्न
रंगीन शिक्षाको देखावटी पसल थाप्छन्
शिक्षा किन्नेलाई त त्यसको महत्व थाहा होला
ती शैक्षिक दलालहरुलाई शिक्षाको अर्थ थाहा होला कि नहोला?
आफ्नो स्वाश्थ्य किन्नलाई यहाँ
थुप्रै छन् ऋणका भारी बढाउने
धनका भकारी बढाउनलाई यहाँ
धेरै छन् स्वास्थ्यका पसल थाप्ने
ऋणको भार स्वास्थ्य किन्नेलाई त थाहा होला
ती स्वास्थ्यका व्यापारीलाई यो कुरा थाहा होला कि नहोला?
घर परिवार धान्नलाई यहाँ
आफ्नै जवानी बेच्छन् कोही
जवानीको रस किन्नलाई यहाँ
श्री सम्पत्ति नै सक्छन् कोही
जवानी बेच्नेलाई त घरको महत्व थाहा होला
रस किन्नेलाई जवानीको महत्व थाहा होला कि नहोला?
-1763886130.jpeg)
-1746009348.jpg)
