कविता
तिमीले हिमाललाई सेतो रंगले सिङ्गारिदिँदा,
म कल्पना गर्छु हाम्रो पवित्र सम्बन्धको,
तिमीले हिमाललाई रातो रंगले सिउँदो हाल्दा,
म कल्पना गर्छु हाम्रो जीवन्त प्रेमको।
तिमीले हिमाललाई निलो रंगले पोतिदिँदा,
म कल्पना गर्छु हाम्रो मजबुत भावनाको,
तिमीले हिमाललाई पहेलो रंगले छ्यापिदिँदा,
म कल्पना गर्छु हाम्रो शान्त भविष्यको।
तिमीले हिमाललाई हरियो रंगले रङ्गाउँदा,
म कल्पना गर्छु हाम्रो स्वच्छ स्फूर्ति वैशको,
तिमीले हिमाललाई गेरु रंगले लत्पत्याउँदा,
म कल्पना गर्छु हाम्रो आध्यात्मिक तपस्याको।
तिमीले हिमाललाई खैरो रंगले खेलाइरहँदा,
म कल्पना गर्छु हाम्रो सन्तुलित हृदय मायाको,
तिमीले हिमाललाई कालो रंगले कोरिरहँदा,
म कल्पना गर्छु हाम्रो मनोभावनामा आउने बाढीको।
