विश्व कप छनोटअन्तर्गत समूह सीको खेलमा विश्व च्याम्पियन जर्मनीले सान मारिनोलाई ७–० गोलको उपहार दिएको छ।
जर्मनीको जितमा होफेनहेमका स्ट्राइकर सान्ड्रो वेन्गरले ह्याट्रिक गोल गरेका थिए। उनको यो पहिलो ह्याट्रिक थियो, अन्तर्राष्ट्रिय फुटबलमा। अन्य गोल आर्सनलका डिफेन्डर सेकोड्रान मुस्ताफी, पेरिस सेन्टजर्मनीका जुलियान ड्राक्सलेर, आयाक्स विङ्गर अमिन योनेस र बायर लेभरकेसेनका जुलियन ब्रान्डेटले गरेका थिए।
जर्मनीले आफ्नो समूहको ६ वटै खेल जितेको छ। ऊ हाल १८ अंकका साथ शीर्षस्थानमा छ। दोस्रो स्थानमा रहेको उत्तरी आयरल्यान्डभन्दा जर्मनी ५ अंकले माथि छ। उत्तरी आयरल्यान्डले शनिवार राती नै भएको अर्को खेलमा अजरबैजानलाई १–० ले पराजित गर्यो। आइरिस टोलीको हाल १३ अंक छ।
तेस्रो स्थानमा रहेको चेक गणराज्यलाई १–१ गोलको बराबरीमा नर्वेले रोकेको छ। चेक ९ अंकका साथ तेस्रो स्थानमा छ। नर्वे समूहको पाँचौ स्थानमा छ। उसको ४ अंक मात्र छ।
