सम्पादकीय
काठमाडौंको तीनकुनेमा शुक्रबार भएको राजावादीहरूको प्रदर्शन र त्यस क्रममा भएका हिंसात्मक घटनाका विभिन्न भिडिओ क्लिप सार्वजनिक भइरहेका छन्।
ती भिडिओ क्लिपमध्ये अहिले सार्वजनिक भएको एउटा क्लिप अत्यन्तै संवेदनशील देखिन्छ। त्यसमा प्रदर्शनकारीहरू सामान्य रूपले हिँडिरहेका देखिन्छन्। त्यसै क्रममा गोली चलेको आवाज आउँछ र एक जना प्रदर्शनकारी सडकको बीचमा ढल्छन्।
यो भिडिओ कति वास्तविक हो, हामीलाई थाहा छैन। जोडजाड गरेर बनाइएको हो कि, त्यो पनि हामी भन्न सक्दैनौं। सेतोपाटीले यसबारे प्रहरीसँग सोध्दा उक्त भिडिओ क्लिपको वास्तविकताबारे अनुसन्धान गरिरहेको बताएको छ। तर यो भिडिओ साँचो हो भने त्यसले एउटा बर्बर दृश्य कैद गरेको छ।
सामान्य रूपले हिँड्दै गरेका र प्रहरीसँग धेरै दुरीमा रहेका प्रदर्शनकारीलाई जानीजानी पछाडिबाट गोली हान्नुपर्ने कुनै दरकार हुन्न। प्रहरीले त्यसो गरेको हो भने त्यो नागरिकमाथि प्रहरीको बर्बर हमला हो।
गोलीको आवाज आएको केही बेरमा ती युवा सडकमा ढलेका देखिन्छन्। प्रहरीले हानेको गोली रबरको हो वा बन्दुकबाट निस्किएको प्राणघातक गोली हो? कतिपय मानिसले सडकमा ढलेका तिनै युवा प्रहरीको गोली लागेर बितेका कीर्तिपुरका सविन महर्जन हुन् भन्ने दाबी गरेका छन्। सविनलाई मृत घोषित गरेको टिचिङ अस्पतालका डाक्टरले पनि उनको छातीमा गोली लागेको बताएका थिए। ती युवालाई भने पछाडिबाट गोली लागेको देखिन्छ।
के सविनलाई पछाडिबाट लागेको गोली उनको शरीर छिचोलेर छातीबाट निस्किएको हो? वा, यी अर्कै युवा हुन्? यी सारा प्रश्न अहिले अनुत्तरित छन्।
प्रदर्शन क्रममा तीन जना युवामाथि गोली लागेको प्रहरीले जनाएको छ। त्यसमध्ये सविन महर्जनको मृत्यु भइसकेको छ भने दुई जनाको वीर अस्पतालमा उपचार हुँदैछ। गोली लागेका तीन जनामध्ये कसैलाई पनि पछाडिबाट गोली नलागेको प्रहरीको दाबी छ। वीर अस्पतालमा उपचार भइरहेका एक जना घाइतेको पेटमा गोली लागेको प्रहरीले बताएको छ। के उपचाररत घाइते तीनकुनेको सडकमा ढलेका तिनै युवा हुन्?
गृह मन्त्रालय र सरकारले यो भिडिओ क्लिपमा देखिएको घटना तुरून्त छानबिन गरोस् र सत्यतथ्य बाहिर ल्याओस्। सामान्य रूपमा हिँडिरहेका प्रदर्शनकारीमाथि प्रहरीले पछाडिबाट ताकेर गोली हानेको रहेछ भने त्यो प्रहरीको बर्बरता हो। त्यसरी गोली हान्ने प्रहरीको पहिचान होस् र उनीमाथि तुरून्तै कारबाही गरियोस्। नत्र प्रहरीमा गैरजिम्मेवारीले बढावा पाउँछ।
कुनै पनि राजनीतिक प्रदर्शनमा प्रहरीले गर्ने अतिरिक्त बल प्रयोग र यस्ता बर्बरतापूर्ण आक्रमणलाई राज्यले तुरून्तै दुरूत्साहित गर्नुपर्छ। दोषी जोगाउन कुनै मोलाहिजा गरियो भने नागरिकको जीउज्यानको सुरक्षा गर्ने जिम्माबाट राज्य चुकेको मानिनेछ।
***
यो पनि: प्रहरी प्रवक्ताले भने– कसैलाई पनि पछाडिबाट गोली लागेको छैन
-1743155866.jpg)
