प्रेस सेन्टर दाङका अध्यक्ष एवं पत्रकार महासंघ दाङका उपाध्यक्ष डिल्ली मल्ललाई सभामुख कृष्णबहादुर महराको प्रेस संयोजकका रूपमा सफारिस गरिएको छ।
प्रेस सेन्टर दाङको शुक्रबार घोराहीमा बसेको बैठकले मल्ललाई सिफारिस गरेको हो।
मल्ल दाङबाट प्रकाशित हुँदै आएको नौलो जनउभार साप्ताहिक पत्रिकाको सम्पादक हुन्। सल्यानको कुमाख गाउँपालिकाका स्थायी बासिन्दा मल्ल माओवादीको जनयुद्धकालदेखि नै पत्रकारितामा क्षेत्रमा क्रियाशिल व्यक्ति हुन्।
उनी विभिन्न समयमा जनादेश, जनदिशा, गोरखापत्र, लाल रक्षक, लगायतका पत्रपत्रिकामा रिर्पोटिङको भूमिकामा थिए। मल्लले नौलो जनउभार, अन्तरध्वनी साहित्यिक त्रैमासिक लगायत विभिन्न पत्रपत्रिकाको सम्पादनको भूमिका निर्वाह गरिसकेका छन्। पत्रकारितामा आउनु अघि मल्ल माओवादी निकट प्रतिरोध,सामना, लगायतका साँस्कृतिक टोलीमा रहेर काम गरेका थिए।
यसैबीच प्रेस सेन्टर दाङको कार्यवाहक अध्यक्षको जिम्मेवारी वरिष्ठ उपाध्यक्ष प्रकाश चौधरीलाई दिइएको छ। प्रेस सेन्टर दाङका अध्यक्ष मल्लको अध्यक्ष तथा माओवादी केन्द्रका जिल्ला सह इन्चार्ज हेमराज शर्मा डायमण्डको प्रमुख अतिथ्यमा बैठक भएको थियो।
