नीति तथा कार्यक्रममै संविधान संशोधन गरिने उल्लेख गर्न राजपा र फोरमको संशोधन दर्ता

सेतोपाटी संवाददाता

काठमाडौं, जेठ ९

राष्ट्रिय जनता पार्टी नेपाल र संघीय समाजवादी फोरमले सरकारको नीति तथा कार्यक्रममा 'संविधान संशोधन गरिनेछ' भन्ने वाक्याशं थप गर्न संशोधन दर्ता गराएका छन्।

फोरमका सांसद प्रदीप यादवले बुँदा ७ मा 'राष्ट्रिय सहमतिका आधारमा संविधान संशोधन गरिनेछ भन्ने' वाक्याशं राख्न संशोधन दर्ता गराएका हुन्।

सरकारको नीति तथा कार्यक्रममाथि आजदेखि संसदमा छलफल सुरू हुँदैछ।

‘समाजको उत्पत्ति र बनोट, सभ्यता र संस्कृतिको विकास समेत विविधतापूर्ण छ। यो विविधता कुनै थिचोमिचो र आक्रमणको परिणाम होइन। सम्भता, भाषा र संस्कृतिको विकास एवं राष्ट्र निर्माणको प्रक्रियामा हाम्रो भूगोल, इतिहास र विकासक्रमले दिएको यथार्थ हो', बुँदा ७ मा उल्लेख छ।

[caption id="attachment_160377" align="alignnone" width="1200"]

तस्बिर : नारायण महर्जन/सेतोपाटी[/caption]

संघीय फोरमकै रामसहाय यादवले दर्ता गरेको अर्को संशोधनमा भने बुँदा ४ मा 'संघीय शासन, राष्ट्रिय पहिचानको मान्यता, समानुपातिक समावेशीकरण, नागरिक स्वतन्त्रता तथा सामाजिक न्यायको प्रत्याभूतिका लागि संविधान संशोधन गरिनेछ' भन्ने वाक्यांश राख्न माग गरिएको छ।

राजपाका अनिल झा र लक्ष्मणलाल कर्णले नीति तथा कार्यक्रममा दर्ता गराएको संशोधन 'शोषित, उत्पीडित, बहिष्कृत समुदायको अधिकारको लागि संविधानमा आवश्यक संशोधन गरिनेछ' भन्ने शब्द राख्न माग गरिएको छ।

प्रकाशित मिति: बुधबार, जेठ ९, २०७५ १२:०८

सिफारिस