केपी ओली नेतृत्वको सरकारमा दुई जना उपप्रधानमन्त्री थपिएका छन्। ओली नेतृत्वको सरकारमा रक्षा मन्त्री ईश्वर पोखरेल र संघीय समाजवादी फोरम, नेपालका अध्यक्ष उपेन्द्र यादव शुक्रबार उपप्रधानमन्त्रीमा नियुक्त भएका हुन्।
रक्षामन्त्री पोखरेललाई उपप्रधानमन्त्रीमा बढुवा गरिएको हो भने यादवलाई आजै उपप्रधानमन्त्रीसहित स्वास्थ्य मन्त्रीमा नियुक्त गरिएको हो। नवनियुक्त उपप्रधानमन्त्रीद्धय पोखरेल र यादवलाई शुक्रबार अपरान्ह राष्ट्रपति विद्या भण्डारीले सपथ खुवाएकी हुन्।
वरीयतामा यादव तेस्रोमा रहने सहमति भएको प्रधानमन्त्रीका प्रेस सल्लाहकार कुन्दन अर्यालले सेतोपाटीलाई जानकारी दिए।
यादव यसअघि २०६५ सालमा परराष्ट्र तथा उपप्रधानमन्त्री भएका थिए।
त्यसैगरी संघीय समाजवादी फोरम, नेपालबाट सहरी विकास मन्त्रीमा मोहम्मद इस्तियाक राईनलाई नियुक्त गरिएको छ। त्यसैगरी प्रधानमन्त्री ओलीले संचार तथा सूचना प्रविधि राज्यमन्त्री गोकुल बाँस्कोटालाई पनि सोही मन्त्रालयको मन्त्रीमा बढुवा गरेका छन्।
नवनियुक्त मन्त्रीद्धय राई र बाँस्कोटाले पनि राष्ट्रपति भण्डारीबाट सपथ लिएका छन्। संघीय समाजवादी फोरम, नेपालबाट २ जना थप गरिएसँगै ओली नेतृत्वको मन्त्रीपरिषद २४ सदस्यीय भएको छ।
राष्ट्रपति भवन सितल निवासमा आयोजित सपथग्रहण समारोहमा उपराष्ट्रपति नन्दबहादुर पुन, प्रधानमन्त्री केपी शर्मा ओली, प्रतिनिधिसभाका सभामुख कृष्णबहादुर महरा, राष्ट्रिय सभाका अध्यक्ष गणेशप्रसाद तिमिल्सिना, सरकारका उच्च पदस्थ कर्मचारीहरुको सहभागिता रहेको थियो।
| ओली मन्त्रिपरिषद |
| क्र.सं. | नाम, थर | कार्य विभाजन |
| प्रधानमन्त्री |
| १ | श्री के.पी. शर्मा ओली | |
| उपप्रधानमन्त्री |
| २ | श्री ईश्वर पोखरेल | रक्षा |
| ३ | उपेन्द्र यादव | स्वास्थ्य तथा जनसंख्या |
| मन्त्री |
| ४ | श्री रामबहादुर थापा | गृह |
| ५ | श्री प्रदीपकुमार ज्ञवाली | परराष्ट्र |
| ६ | श्री बर्षमान पुन | ऊर्जा, जलस्रोत तथा सिँचाई |
| ७ | श्री गिरिराजमणि पोखरेल | शिक्षा, विज्ञान तथा प्रविधि |
| ८ | श्री मातृकाप्रसाद यादव | उद्योग, वाणिज्य तथा आपूर्ति |
| ९ | श्री रघुबीर महासेठ | भौतिक पूर्वाधार तथा यातायात |
| १० | श्री गोकर्ण विष्ट | श्रम , रोजगार, तथा सामाजिक सुरक्षा |
| ११ | श्री शक्तिबहादुर वस्नेत | वन तथा वातावरण |
| १२ | श्री लालबाबु पण्डित | सङ्घीय मामिला तथा सामान्य प्रशासन |
| १३ | श्री थममाया थापा | महिला, बालबालिका तथा ज्येष्ठ नागरिक |
| १४ | डा. युवराज खतिवडा | अर्थ |
| १५ | श्री जगतबहादुर सुनार (विश्वकर्मा) | युवा तथा खेलकुद |
| १६ | श्री रविन्द्रप्रसाद अधिकारी | संस्कृति, पर्यटन तथा नागरिक उड्डयन |
| १७ | श्री शेरबहादुर तामाङ | कानुन, न्याय, तथा संसदीय मामिला |
| १८ | श्री चक्रपाणी खनाल | कृषि, भूमि व्यवस्था तथा सहकारी |
| १९ | श्री बीना मगर | खानेपानी |
| २० | श्री गोकुलप्रसाद वाँस्कोटा | सञ्चार तथा सूचना प्रविधि |
| २१ | मोहम्मद इस्तियाक राई | सहरी विकास |
| राज्यमन्त्री |
| २२ | श्री पद्माकुमारी अर्याल | स्वास्थ्य तथा जनसंख्या |
| २३ | श्री धनबहादुर बुढा | संस्कृति, पर्यटन तथा नागरिक उड्डयन |
| २४ | श्री रामकुमारी चौधरी | कृषि, भूमि व्यवस्था तथा सहकारी |
