स्थानीय तहको निर्वाचनमा सत्तारूढ पाँच दलीय गठबन्धनमा रहेका जनता समाजवादी पार्टी र नेकपा एकीकृत समाजवादी लुम्बिनी प्रदेशका जिल्ला समन्वय समितिमा शून्य भएका छन्।
गठबन्धनमा नरहेको लोकतान्त्रिक समाजवादी पार्टीले दुइटा पालिकामा उपप्रमुख हात पार्दा गठबन्धनमै रहेका जसपा र एकीकृत समाजवादीले भने लुम्बिनी प्रदेशका कुनै पनि जिल्लामा प्रमुख/उपप्रमुख पाउन सकेनन्।
गत वैशाख ३० गते सम्पन्न स्थानीय तहको निर्वाचनबाट विजयी भएका पालिकाका प्रमुख/उपप्रमुखले मतदान गरी जिल्ला समन्वय समिति चयन गर्ने प्रावधान रहेको छ। सोही अनुसार लुम्बिनी प्रदेशका १२ वटै जिल्लामा जिल्ला समन्वय समिति चयन भइसकेको छ।
स्थानीय तहहरूमा गठबन्धन गरेर चुनाव लडेका सत्तारूढ पाँच दलीय गठबन्धनले अधिकांश जिल्लाको समन्वय समितिमा पनि गठबन्धन गर्दा एमाले भने एक्लै रहेको थियो। प्राप्त परिणाम अनुसार १२ वटा जिल्लामा नेपाली कांग्रेसले ६ वटा जिल्लामा प्रमुख र ३ वटामा उपप्रमुख जितेर पहिलो दल बनेको छ।
गठबन्धनविरूद्ध एक्लै निर्वाचनमा भाग लिएको नेकपा एमालेले पनि ४ वटा जिल्लामा प्रमुख र २ वटामा उपप्रमुख जितेर दोस्रो भएको हो भने नेकपा माओवादी केन्द्रले २ वटा जिल्लामा प्रमुख र ५ वटा जिल्लामा उपप्रमुख जितेको छ।
प्रदेशका १२ वटै जिल्लामा जिसस नेतृत्व चयन हुँदा कांग्रेसले ६ वटा जिल्लामा प्रमुख र ३ वटामा उपप्रमुख जितेर जिससमा वर्चश्व कार्यम गर्न सफल भएको हो।
निर्वाचन आयोगका अनुसार लोकतान्त्रिक समाजवादी पार्टीले पनि २ वटा जिल्लामा उपप्रमुख जितेर जनता समाजवादी पार्टी र एकीकृत समाजवादी पार्टीलाई उछिनेको छ।
लोकतात्रिक समाजवादी पार्टीले कपिलवस्तु र रूपन्देहीको उपप्रमुख जितेको छ।
नेपाली कांग्रेसले रूपन्देही, दाङ, बाँके, गुल्मी, प्युठान र बर्दियामा प्रमुख तथा दाङ, बाँके र बर्दियामा उपप्रमुख जितेको छ।
त्यस्तै, नेकपा एमालेले पाल्पा, अर्घाखाँची, नवलपरासी र कपिलवस्तुमा प्रमुख तथा पाल्पा र अर्घाखाँचीमा उपप्रमुख जितेको छ।
अर्घाखाँची र पाल्पामा सत्ता गठबन्धन भन्दा एमाले एक्लै बलियो भए पनि पश्चिम नवलपरासी र कपिलवस्तुमा भने एमाले कमजोर रहेको थियो। ती जिल्लामा पनि एमालेले प्रमुख पद जित्न सफल भएको छ।
नेकपा माओवादी केन्द्रले रोल्पा र रूकुमपूर्वमा गठबन्धन नगरी प्रमुख जितेको छ भने रोल्पा, रूकुमपूर्व, गुल्मी, प्युठान र नवलपरासी पश्चिममा उपप्रमुख जित्न सफल भएको निर्वाचन आयोगले जनाएको छ।
