नेकपा (माओवादी केन्द्र) निकट विद्यार्थी संगठन अखिल (क्रान्तिकारी)को असन्तुष्ट पक्षले अध्यक्ष पञ्चा सिंहलाई तत्काल पदमुक्त गर्न पार्टी नेतृत्वसमक्ष माग गरेको छ।
संगठनभित्रको विवादबारे रिपोर्टर्स क्लब नेपालमा आज (मंगलबार) पत्रकार सम्मेलन गर्दै क्रान्तिकारीदवारा निलम्बनमा परेका उपाध्यक्ष पवन कार्की समूहले अध्यक्ष सिंहलाई पदमुक्त गर्न र उनले गठन गरेका सबै समिति खारेज गरी विशेष राष्ट्रिय महाधिवेशनको माग गरेको हो।
कार्की समुहले अध्यक्ष सिंहलाई तत्काल पदमुक्त गर्दै विद्यमान अवैधानिक समिति खारेज गरी अविलम्ब विशेष राष्ट्रिय महाधिवेशन आयोजना गर्न सम्बन्धित पक्षसँग माग गरेको हो। उनीहरूले यस विषयमा पार्टीका अध्यक्ष पुष्पकमल दाहाल ‘प्रचण्ड’, स्थायी कमिटीको सदस्यसँग पनि आफूहरूको माग पुर्याइसकेको जानकारी दिएका छन्।
विद्यार्थी आन्दोलनले आजसम्म सोचेजति उपलब्धी हासिल गर्न नसकेको भन्दै कार्कीले विद्यार्थीको हकहितको लागि काम गर्नुपर्ने अखिल (क्रान्तिकारी) आफ्नै संगठनभित्रको समस्यामा रूमलिएको गुनासो गरे।
जनता बाँच्न नसक्नेगरी बढेको महंगी र मूल्यवृद्धिका विषय उठान गर्नुपर्ने संगठन नै आज अराजक गतिविधिमा रूमलिएको उल्लेख गर्दै उनले तत्काल अहिले भएका अवैधानिक निर्णय खारेज गर्नुपर्ने बताए। लामो समयदेखि आफ्नो संगठनमा समस्या आइरहेको भन्दै अहिले अध्यक्ष सिंहका कारण झन् अप्ठ्यारोमा परेको उनको तर्क छ। गत असोजमा भएको अखिलको २२औं राष्ट्रिय सम्मेलनबाट अध्यक्षमा पञ्चा सिंहलाई जबरजस्ती निर्वाचित गरेको उनको भनाइ छ। कार्कीले संगठनभित्र समस्याको सुरुआत २२औं सम्मेलनबाट भएको र तेस्रो विस्तारित बैठकबाट भने सबै विवाद र लफडा छताछुल्ल भएको बताए।
संगठनको २२औं सम्मेलनले एउटा अध्यक्ष निर्वाचित गरेर कुनै पदाधिकारी तोक्न नसकेकोमा आक्रोश पोख्दै उनले त्यतिबेला जबरजस्ती विधानविपरीत कमिटी घोषणा गरेको बताए।
