नेकपा एमालेका संगठन विभाग प्रमुख खगराज अधिकारी गण्डकी प्रदेशको मुख्यमन्त्री बन्ने पक्का भएको छ।
प्रदेश प्रमुख पृथ्वीमान गुरूङले दिएको समयसीमा आज दिउँसो ४ बजे सकिँदैछ। उक्त समय भित्रै मुख्यमन्त्री दाबी पेश गर्न जाने तयारी भइरहेको एमाले सांसद यशोदा रिमालले जानकारी दिइन्।
सत्ता गठबन्धनको आइतबार साँझ बसेको शीर्ष नेताको बैठकले प्रदेश भागबण्डा गर्दा गण्डकी एमालेको भागमा परेको थियो।
प्रदेश सभामा २२ सिट रहेको एमाले गण्डकी संसदीय दलका नेता अधिकारीलाई माओवादीको ८ र राप्रपाका २ सांसदले समर्थन जनाएका छन्।
एमालेको सममर्थनमा माओवादी केन्द्रका अध्यक्ष प्रचण्ड प्रधानमन्त्री बनेपछि प्रदेश सभामा २७ सिटसहित सबैभन्दा ठूलो दल नेपाली कांग्रेस भने प्रतिपक्षमा पुगेको छ।
६० सदस्य रहेको गण्डकीमा सरकार गठन गर्न आवश्यक बहुमत ३१ सांसद चाहिन्छ। अधिकारीलाई एमाले, माओवादी र राप्रपा गरी ३२ सांसदले समर्थन दिएका छन्।
मनाङबाट स्वतन्त्र सांसद जितेर नेकपा एकिकृत समाजवादी प्रवेश गरेका राजीव गुरूङ ‘दीपक मनाङे’ ले पनि सत्ता गठबन्धनलाई सहयोग गर्ने संकेत गरेका छन्।
नेकपा एमालेका संगठन विभाग प्रमुख एवं स्थायी कमिटी सदस्य अधिकारी गण्डकीको मुख्यमन्त्री बन्ने लक्ष्यसहित कास्की–१ (२) बाट चुनाव लडेका थिए। यद्यपि, उनले आफ्नो चाहना प्रतिनिधि सभामै रहे पनि पार्टीले प्रदेश पठाएको बताउँदै आएका छन्।
प्रदेशमा चुनाव लडेर फेरि मुख्यमन्त्री बन्ने चाहना राखेका उपमहासचिव पृथ्वी सुब्बा गुरूङलाई उनकै समूहको जोडबलमा प्रतिनिधि सभाको टिकट दिइएको थियो। यसरी गुरूङलाई प्रतिनिधि सभामा पठाउन सफल भएका अधिकारी केन्द्रिय सत्तामा नयाँ गठबन्धन बनेसँगै मुख्यमन्त्रीमा उनलाई चिठ्ठा परेको हो।
११ वर्षकै उमेरदेखि राजनीतिमा लागेका अधिकारी पहिलो पटक २०७० सालमा सुशील कोइराला नेतृत्वको सरकारमा स्वास्थ्य मन्त्री बनेका थिए। २०७४ को चुनावपछि प्रतिनिधि सभामा एमाले संसदीय दलको प्रमुख सचेतक बनेका अधिकारी १३ दिने गृहमन्त्री पनि हुन्।
एमाले अध्यक्ष केपी शर्मा ओलीले दोस्रो पटक संसद विघटन गरेपछि उनलाई २०७८ जेठ २७ मा गृहमन्त्री नियुक्त गरेका थिए।
संसद विघटनपश्चात मन्त्रिपरिषद विस्तारका विरूद्ध परेको रिटमा सुनुवाई गर्दै सर्वोच्च अदालतले १३ दिनमै उनीसहित अन्य मन्त्रीलाई पदमुक्त गरिदिएको थियो।
२०४८ सालदेखि प्रतिनिधि सभा सदस्यमा चुनाव लडेका अधिकारी ३ पटक हार बेहोरेका थिए भने २ पटक जितेका थिए।
११ वर्षकै उमेरमा पोखरा–३१ को आनन्दज्योति माविको स्वतन्त्र विद्यार्थी युनियनको सभापति बनेका अधिकारी २०३३ सालमा नेकपा पुष्पलाल समूहको सदस्य बनेका थिए।
२०३६ सालमा अनेरास्ववियुको कास्की जिल्ला अध्यक्ष बने। त्यसपछि २०४० र २०४१ सालमा पृथ्वीनारायण क्याम्पस पोखराको स्ववियु सभापति जिते।
२०३८ सालमा अनेरास्ववियुका केन्द्रिय सदस्य बनेका अधिकारी त्यसको २ वर्षपछि उपाध्यक्ष बने। अर्धभुमिगत रूपमा पञ्चायत विरुद्ध आन्दोलन गर्दा उनी २०४२ सालमा पक्राउ परे। पक्राउ परेपछि उनलाई कास्की, तनहुँ, रौतहटलगायतका जेलमा पठाइयो। प्रजातन्त्र पुनर्स्थापनापछि २०४६ सालमा मात्र उनी रिहा भएका थिए।
हाल एमालेका अध्यक्ष रहेका केपी शर्मा ओली नेतृत्वमा गठन भएको प्रजातान्त्रिक राष्ट्रिय युवा संघमा अधिकारी केन्द्रिय सदस्य बने। त्यसपछि उनी अध्यक्ष ओलीका पक्षमा खरो उत्रँदै आएका छन्।
२०५१ सालको मध्यावधि निर्वाचन जितेर पहिलो पटक संसद छिरेका अधिकारीले २०५४ मा संसदीय दलको सचेतक बने। त्यसपछि लगातार चुनाव हारेका उनले २०७४ मा बाम गठबन्धनको उम्मेदवार बनेर कास्की–१ बाट प्रतिनिधि सभा चुनाव जितेका थिए।
बाल्यकालदेखि राजनीतिक यात्रा थालेका अधिकारीले गण्डकी प्रदेशको मुख्यमन्त्री बन्ने अवस्था आइस्क्दा अनेक आरोह–अवरोह पार गरेका छन्। राजनीतिक यात्राका दौरान आफ्नो र अध्यक्ष ओलीको आलोचना गर्नेलाई सहन नसक्ने उनका निकटस्थहरु बताउँछन्।
प्रदेश सरकारको नेतृत्वमा पुगेपछि अधिकारीले कस्तो रवैया अपनाउँछन्, त्यसैमा गण्डकी सरकार, प्रदेश सभा र उनको राजनीतिक भविश्य पनि निर्धारण हुनेछ।
