बाबुराम भट्टराई नेतृत्वको नेपाल समाजवादी पार्टी (नेसपा) ले नेकपा (माओवादी केन्द्र) सँग पार्टी एकता गर्ने सहमति नभएको दाबी गरेको छ।
अर्का अध्यक्ष महिन्द्र राय यादवसहित केही नेता माओवादीमा समाहित भएको हुन सक्ने भन्दै नेसपाले त्यो सहमतिलाई पार्टीले नचिन्ने प्रतिक्रिया दिएको हो।
यो पनि: माओवादी केन्द्र र नेसपाबीच पार्टी एकता गर्ने सहमति
आइतबार पार्टी केन्द्रीय कार्यालयमा बसेको केन्द्रीय कार्यकारिणी समिति बैठकले नेसपा र माओवादीबीच पार्टी एकता गर्ने सहमति नभएको निष्कर्ष निकालेको हो।
अध्यक्ष यादव पक्षले माओवादी केन्द्रसँग पार्टी एकता गर्ने शनिबार सहमति गरेका थिए।
कार्यालय प्रमुख रोशन पोखरेलले केही नेताहरू माओवादीमा समाहित हुन खोजेको सहमतिलाई पार्टी एकता भन्न नमिल्ने प्रतिक्रिया दिए।
‘त्यो सहमति व्यक्तिगत हो। त्यसलाई नेसपाले खारेज गरिराख्नु पनि पर्दैन। महेन्द्र राय यादव, गंगानारायण श्रेष्ठ र रमेशप्रसाद यादवजीहरूको व्यक्तिगत कुरा हो त्यो,’ पोखरेलले सेतोपाटीसँग भने, ‘त्यो पार्टीको कुरा होइन, हामी त आज बैठक बसिरहेका छौं। त्यो सहमति हामी चिन्दैनौं।’
नेसपाको मंसिर ६ गतेको बैठकले अध्यक्ष भट्टराईको नेतृत्वमा राजनीतिक संवाद समिति बनाएको थियो।
‘त्यो समितिले अग्रगामी रूपमा जाने कुनै दल वा शक्तिसँग संवाद गर्ने भनिएको थियो। अनौपचारिक रूपमा माओवादीलगायत दलसँग पनि बसेर कुराकानी गरिएको हो,’ उनले भने, ‘उहाँहरू खासै अग्रगामी रूपमा अघि बढ्ने देखिएन। त्यसैले नेसपा आफ्नै नीति तय गरेर जान खोजेको छ। अहिले कसैसँग पनि पार्टी एकता गरेर जाने कुरा भएको छैन।’
आइतबारको बैठकमा २० जना केन्द्रीय कार्यकारिणी समिति सदस्य सहभागी भएको उनले दाबी गरे। नेसपामा २९ जना कार्यकारिणी समिति सदस्य छन्। ‘दुर्गा सोबलगायत केही साथीहरू विदेशमा भएर बैठकमा सहभागी हुन सक्नुभएन,’ उनले भने।
नेसपाले सोमबार जडिबुटीमा केन्द्रीय समिति बैठक गर्दैछ। त्यसका एजेन्डा तय गर्न आइतबार कार्यकारिणी समिति बैठक बसेको हो। केन्द्रीय समितिबाट अध्यक्ष यादवसहित केही नेताहरूको जिम्मेवारी खोस्ने नेसपाको तयारी छ।
२०७९ को चुनावमा नेसपा अध्यक्ष यादव सर्लाही क्षेत्र नम्बर २ बाट प्रतिनिधि सभा सदस्य निर्वाचित भएका थिए। त्यस्तै सहअध्यक्ष गंगानारायण श्रेष्ठ सिन्धुलीबाट बागमती प्रदेश सभा सदस्य निर्वाचित भएका थिए। नेसपाले त्यसबेला माओवादीकै चुनाव चिन्ह लिएर निर्वाचन लडेको थियो।
पार्टीभित्र विवाद देखिएपछि भट्टराईले यादवसहित सांसदहरूलाई नेसपाकै सांसदका रूपमा मान्यता दिन संघीय संसद सचिवालयमा पत्राचारसमेत गरेका थिए।
यो पनि: दुई वर्ष नपुग्दै फुट्यो बाबुराम नेतृत्वको नेपाल समाजवादी पार्टी
-1698753961.jpg)
