लुम्बिनी प्रदेशमा एकीकृत समाजवादीकी भगवती अधिकारी पनि मन्त्री बन्ने भएकी छन्।
आफूले दिएको समर्थनबारे सोच्नुपर्ने चेतावनीपछि मुख्यमन्त्री जोखबहादुर महराले अन्तिममा एकीकृत समाजवादीकी भगवती अधिकारीलाई पनि मन्त्री बनाउने भएका हुन्।
मन्त्री बन्ने सूचीमा अधिकारीको नाम पनि समावेश रहेको मुख्यमन्त्री तथा मन्त्रिपरिषद् कार्यालयका सचिव राधिका अर्यालले जानकारी दिइन्।
बिहान एकीकृत समाजवादीलाई बाहिर राखेर मुख्यमन्त्री महराले सरकार विस्तारको तयारी गरेका थिए।
एकीकृत समाजवादीले भने यसअघि भएको सहमति कार्यान्वयनको माग गरेको थियो।
एकीकृत समाजवादीको लुम्बिनीमा एकमात्रै सांसद भगवती अधिकारीले सहमति कार्यान्वयन नभए मुख्यमन्त्रीमा महरालाई दिएको समर्थनबारे सोच्नुपर्ने बताएकी थिइन्।
‘पहिले एकीकृत समाजवादीलाई पनि एउटा मन्त्रालय दिने भन्ने सहमति भएको हो। हामीले त्यही सहमति कार्यान्वयनको माग गर्दै मन्त्रिपरिषद् विस्तारमा आपत्ति जनाएका थियौं। उहाँहरुले विचार गर्नुभयो होला फेरि मेरो नाम पनि समावेश गरेर पठाउनुभएको रहेछ,’ सांसद अधिकारीले भनिन्।
उनले आफू तत्कालका लागि विना विभागीय मन्त्री बन्ने र शपथका लागि जान लागेको बताइन्।
एकीकृत समाजवादी सरकारमा गएपछि लुम्बिनीमा मन्त्रालयको संख्या बढ्ने भएको छ।
यसअघि १० वटा मन्त्रालय रहेकोमा अब ११ वटा हुने भएको छ।
आज एमालेबाट चार जना, नागरिक उन्मुक्ति, जनता समाजवादी पार्टी र स्वतन्त्रबाट एक–एक जनालाई समेटेर सरकार विस्तार गर्न थालिएको हो।
शपथ ग्रहण अपराह्न ५ बजे हुने मुख्यमन्त्री कार्यालयकी सचिव राधिका अर्यालले जानकारी दिइन्।
