नवगठित जनता समाजवादी पार्टीका अध्यक्ष अशोककुमार राईले उपेन्द्र यादवसँग असन्तुष्टि चुलिँदै गएपछि नयाँ पार्टी बनाउनु परेको बताएका छन्।
निर्वाचन आयोगले दिएको दल दर्ताको पत्र संसद सचिवालयमा बुझाउन सोमबार अपराह्न सिंहदरबार पुगेका उनले पार्टीको आसन्न महाधिवेशनमा लाठे रोपाइँ हुने स्थिति देखिएपछि त्यही पार्टीमा बस्ने कुरा राम्रो नहुने भएको भन्दै नयाँ पार्टी दर्ता गरेर जाने आफूहरू निष्कर्षमा पुगेको बताए।
अध्यक्ष राईले सत्ता राजनीतिका कारण आफूहरूले पार्टी विभाजन नगरेको जिकिर पनि गरे।
सांसदहरूले संसदीय दल विभाजन गरेको हुनाले सत्ता राजनीतिसँग कुनै न कुनै रूपमा जोडिन जाने भए पनि सत्ता राजनीतिको कारण पार्टी विभाजन नभएको उनको भनाइ थियो।
अध्यक्ष राईले आफ्नो पार्टीले अब संसदमा रचनात्मक क्रियाकलाप गर्दै अघि बढ्ने बताए।
उनले भने, ‘अब यो चाहिँ पानी उमाल्ने क्रममा तापक्रम बढ्दै बढ्दै जान्छ। सय डिग्री पुगेपछि पानी उम्लिन्छ भन्ने एउटा वैज्ञानिक चाहिँ नियम छ। त्यस्तै हो। अब यहाँहरूले सार्वजनिक क्षेत्रले हेर्दाखेरी एकैचोटि जस्तो भयो। तर कुनै पनि घटना एकैचोटि हुँदैन। त्यसका पछाडि कारणहरू हुन्छन्। र त्यसले विकास गर्नका निम्ति अलिकति समय लिएको हुन्छ, प्रक्रियाहरू पार गरेको हुन्छ। अब विकास क्रमको कुरा भन्ने हो भने कार्यशैलीगत चाहिँ बेमेलहरूले उत्पन्न गरेका असन्तुष्टिहरू थुप्रिँदै थुप्रिँदै जाने र ती सबै चिजहरूको निकास, समाधान खोजेर एकीकृत र सुदृढ पार्टी बनाउने, पार्टीमा ऊर्जा भर्ने ढंगले महाधिवेशन आयोजना गर्नुपर्ने। अब महाधिवेशन नै लाठे रोपाइँ होला जस्तो देखिएपछि अब धेरै असन्तुष्टि,अन्तरविरोध बढाएर पार्टीमा रहिरहनु त्यो राम्रो पनि हुँदैन। राम्रो पनि देखिँदैन।’
उनले अगाडि भने, ‘बरू अलग भएर प्रितीकर सम्बन्ध, सुसम्बन्ध, हार्दिकता पचाइरहनु चाहिँ बेस हुन्छ। एकैठाउँमा बसेर विवाद, बहस गर्ने, अब चाहिँ त्यो खालको असन्तुष्टिहरू पाल्ने स्थिति हुनु भन्दा राम्रो हो। र, अर्को कुरा चाहिँ अब नौ वर्ष भयो। एकता भएर मधेसी जनअधिकार फोरम र संघीय समाजवादी पार्टीको एकता भएर नौ वर्ष भयो। नौ वर्षको सहकार्यमा हामीले भौतिक रूपमा देखिने गरी प्रगति पनि गर्न सकेनौं एकतापछि पनि। जब महाधिवेशन आयोजना गर्ने प्रक्रिया नै विवादास्पद छ। विधिसम्मत छैन। र जबरजस्तीको जोड छ भने पछि त्यो महाधिवेशनले के निकास दिन्छ, के निर्णय दिन्छ भनेर अपेक्षा गर्ने! त्यसकारण हामीले चाहिँ बरू बेस हुन्छ हामी चाहिँ आआफ्नो ढंगले अघि बढौं भनिकन हामीले यो निर्णय गर्यौं।’
अध्यक्ष राईले यादवले सत्ता गठबन्धन फेरबदल गर्ने कुराबारे आफूहरू बेखबर रहेको पनि बताए।
—न्युज एजेन्सी नेपाल