उपप्रधान एवं गृहमन्त्री रवि लामिछानेले प्रतिनिधि सभाको बैठकमा बोल्न पाउनुपर्ने माग गर्दै सभामुख देवराज घिमिरेलाई पत्र लेखेका छन्।
गृहमन्त्री लामिछानेले आफूमाथि उठेका प्रश्नका जवाफ दिनका लागि संसदमा बोल्न अनुमति दिन सोमबार सभामुख घिमिरेलाई पत्र लेखेका हुन्।
‘यही २८ गतेबाट चालु हुने अधिवेशनको प्रारम्भिक दिनहरूमा संसदमा उपस्थित भई गत अधिवेशनमा उठेका प्रश्नहरूको जवाफ दिने व्यवस्था मिलाइदिनुहुन मेरो व्यक्तिगत विषयमा उठेका प्रश्नहरूको सम्बन्धमा उजुरी र जाहेरी, अनुसन्धान तथा अभियोजन समेत नभएको भनि महान्यायाधिवक्ता कार्यालयबाट मलाइ जानकारी गराइएको पत्र यसैसाथ संलन्ग गरी सम्माननीयज्यू समक्ष निवेदन गर्दछु,’ पत्रमा लामिछानेले लेखेका छन्।
लामिछानेले आफूमाथि लागेका आरोपबारे महान्यायाधिवक्ता कार्यालयमा समेत निवेदन दिएका थिए।
सहकारी सम्बन्धी कुनै उजुरी परेको, अनुसन्धान भएको वा अभियोग पत्र दायर भएको भए सोही कुरा र सो सम्बन्धमा कुनै संलग्नता नदेखिएको भए जानकारी पाऊँ भनेर उनले महान्यायाधिवक्ताको कार्यालय समक्ष निवेदन दिएका थिए।
त्यसको जवाफमा महान्यायाधिवक्ता कार्यालयका सहायक न्यायाधिवक्ता अनुकूल बारकोटीले लामिछाने समक्ष पत्र पठाएका छन्।
‘रूपन्देही जिल्ला अदालतमा दायर भएको सुप्रिम बचत तथा ऋण सहकारी संस्था, चितवनको साहारा सहकारी संस्था तथा कास्कीको सूर्यदर्शन सहकारी संस्थाको रकम हिनामिनामा यहाँको संलग्नता रहे नरहेको र कुनै उजुरी परेको, अनुसन्धान वा अभियोग पत्र दायर भएको वा नभएको सम्बन्धमा जिल्ला सरकारी वकिल कार्यालय रूपन्देही, चितवन र कास्कीमा बुझिपठाउँदा यहाँ उपर हालसम्म कुनै उजुरी/जाहेरी अनुसन्धान तथा अभियोजन समेत भएको नदेखिएको जवाफ प्राप्त हुन आएकोले सोही व्यहोरा आदेशानुसार अनुरोध गरिन्छ,’ महान्यायाधिवक्ता कार्यालयले जवाफमा भनेको छ।
-ink-1715063309.jpeg)
