नेकपा (माओवादी केन्द्र) मधेस प्रदेशबाट प्रतिनिधित्व गर्ने केन्द्रीय सदस्यहरूले प्रदेश सम्मेलनको तयारीका लागि बसेको बैठक बहिष्कार गरेका छन्।
महोत्तरीको बर्दिबासस्थित पञ्चधुरा पार्टी प्यालेसमा बसेको केन्द्रीय सदस्य एवं वैकल्पिक सदस्यहरू र सल्लाहकार तथा आयोग सदस्यहरूको बैठक २५ बढि नेताहरूले बहिष्कार गरेका हुन्।
प्रदेश इन्चार्ज लिलामणि पोखरेलले कार्यविभाजनमा एकलौटी गरी निरंकुशता लाद्न खोजेकाले आफूहरूले बैठक बहिष्कार गरेको माओवादीका केन्द्रीय सदस्य जगत यादवले बताए।
उनका अनुसार गत चैत १८ गते प्रधानमन्त्री निवास बालुवाटारमा मधेस प्रदेशका केन्द्रीय सदस्य, वैकल्पिक केन्द्रीय सदस्य, सल्लाहाकार र आयोगका सदस्यहरूको बैठक बसेको थियो।
बैठक समापनको बेला प्रदेश इन्चार्ज पोखरेलले १५ वटा लिखित एजेण्डा वितरण गर्दै आगामी २९ गते प्रदेशको बैठक बस्ने सूचना सुनाएका थिए। तर चैत २९ गते अचानक प्रदेशको बैठक नहुने र उक्त बैठक वैशाख ३ गते बस्ने भन्दै सूचना जारी गरिएको थियो।
तर बैठक बसेर छलफल गर्नुअघि नै चैत ३० गतेकै मितिमा इन्चार्ज पोखरेलले एकलौटी रूपमा कार्यविभाजन गरेको यादवले बताए।
‘हामीलाई दिएको एजेण्डामा बैठक नै नगरी, छलफल नै नगरी इन्चार्जले आफू अनुकूलका मान्छेहरूलाई जिम्मेवारी दिनुभयो। यो निरंकुशता हो। कार्यविभाजन गरिएको भनी आएको परिपत्र फिर्ता हुनुपर्छ नत्र हामी मान्दैनौं,’ यादवले भने, ‘हामी बहुमत सदस्यहरू कार्यविभाजनको विरोध गरी आजको बैठक बहिष्कार गरेका छौं। निर्णय सच्याइएन भने हामी आफ्नो ढंगबाट हिँड्छौं। जबरजस्ती गर्न खोज्यो भने कुनै जिल्लामा बैठक हुन दिदैनौं। यही प्रवृत्तिले मधेसमा पार्टी हराउँदै गएको छ।’
कार्यविभाजन सच्याउन माग गर्दै वैशाख १७ गते १० जना केन्द्रीय सदस्य तथा वैकल्पिक केन्द्रीय सदस्यहरूले पार्टी अध्यक्ष प्रचण्डलाई पत्र समेत लेखेका थिए। तर उक्त पत्रको कुनै जवाफ नआएको नेताहरूले बताएका छन्।
‘जिल्ला इन्चार्ज भइसकेका कमरेडहरूलाई प्रतिनिधिसभा क्षेत्रको इन्चार्ज तोकिएको छ र जुनियर कमरेडलाई इन्चार्ज बनाइएको छ। अवसरका लागि पार्टी छोडेर भागेकाहरूलाई इन्चार्ज बनाएर निरन्तर पार्टीका लागि काम गर्नेलाई लखेट्ने योजना बनाइएको हो। त्यसैले हामीले यो बैठक बहिष्कार गर्यौं,’ अर्का एक केन्द्रीय सदस्यले भने।
पार्टीको मधेस प्रदेश समिति निर्माण गर्न मधेस प्रदेशमा कार्यक्षेत्र रहेका पूर्ण र वैकल्पिक केन्द्रीय सदस्य रहने गरी मधेस प्रदेश सम्मेलन आयोजक समिति गठन गरिएको छ। समितिका संयोजक प्रदेश इञ्चार्ज पोखरेल रहेका छन्। अगामी भदौ महिनाभित्र अनिवार्य रूपमा प्रदेश सम्मेलन सम्पन्न गरी प्रदेश समिति निर्माण गर्नुपर्ने छ।