रक्षामन्त्री हरिप्रसाद उप्रेतीले देशमा राष्ट्रियताको विषय कमजोर देखिएको बताएका छन्।
मंगलबार राष्ट्रिय सभा अन्तर्गतको संघीयता सबलीकरण तथा राष्ट्रिय सरोकार समितिको बैठकमा बोल्दै उनले देशमा राष्ट्रियताको विषय कमजोर देखिएको बताएका हुन्।
उनले विभिन्न व्यक्तिहरूले बैंकको किस्ता तिर्न नसक्दा र बच्चाहरूको फी तिर्न नसक्दा समेत राष्ट्रियताप्रति प्रश्न उठाउने गरेको भन्दै राष्ट्रियतालाई सस्तो विषय नबनाउन आग्रह गरे।
उनले विगतमा जस्तो सीमामा तरबार लिएर बसेमात्रै राष्ट्रिय सुरक्षा नहुने भन्दै अहिले वातावरण, भोकमरी लगायतका कुराहरूसँग पनि लड्दै राष्ट्रिय सुरक्षा कायम गर्नुपर्ने अवस्था रहेको बताए।
उनले भने, ‘एसियाका दुई शक्तिशाली राष्ट्रबीच रहेको नेपाल संवेदनशील भूराजनीतिक अवस्थितिमा रहेको मुलुक हो। अतः हाम्रो सन्दर्भमा राष्ट्रिय सुरक्षाको विषय धेरै पेचिलो र यो विषयलाई राजनीतिक तथा प्रशासनिक नेतृत्व तथा नीति निर्माण तहमा काम गर्ने प्रत्येक कर्मचारी, पदाधिकारीहरूले गम्भीरताका साथ बुझ्न र गहिरोसँग मनन गर्नको निम्ति आवश्यक छ।’
उनले आफ्नो मौलिकता, संस्कृति र परम्परामाथि समेत प्रहार गर्ने गरिएको भन्दै यसप्रति सबै सचेत हुनुपर्ने बताए।
‘मुलुकको भूमि, स्वतन्त्रता, सार्वभौमसत्ता, सुरक्षा रक्षा मन्त्रालय वा नेपाली सेनाको मात्र विषय नभएर राज्यका सबै शक्ति र संगठनको साझा कर्तव्य हो। राष्ट्रिय अस्मिताको रक्षा र राष्ट्रिय हितको संरक्षणका लागि राष्ट्रको सबै शक्ति र संरचना एक ढिक्का भएर उभिन आवश्यक छ,’ उनले भने, ‘अहिले हाम्रो राष्ट्रिय सुरक्षाको विषय, राष्ट्रियताको विषय कमजोर भएको देखिन्छ।’
उनले सुरक्षाको सवालमा ‘होल अफ द नेसन’को अवधारणाले मात्रै काम गर्ने पनि बताए।
‘राष्ट्रिय सुरक्षाको विषय आज पहिलाको इतिहासमा जस्तो घोडामा तरबार लिएर घुमाएर बोर्डरमा हिँड्ने मात्रै होइन। आज वातावरणसँग, भोकमरीसँग सम्बन्धित सबै कुराहरूमा अगाडि बढ्नु अपरिहार्य जस्तो देखिएको छ,’ उनले भने, ‘सुरक्षाको सवालमा होल अफ द नेसनको अवधारणाले मात्रै काम गर्दछ।’
उनले देशको सम्पदाको महत्वलाई बुझ्नुपर्ने बताए।
प्राकृतिक स्रोत सम्पदाहरूले धनी भएर पनि नेपाल गरिब हुनु आठौं आश्चर्य भएको उनले टिप्पणी गरे।
‘आफूले मान्दै आएका चिजहरूलाई, आफ्नो इच्छाहरू पूरा नहुँदाखेरी लल्कार्ने। यी विषयहरूलाई कुन तरिकाले जाँदाखेरी राम्रो हुनसक्छ र आफ्नो मौलिकता रहन्छ? भन्ने विषयमा समितिले पनि निर्देश गरोस्। हाम्रो जस्तो मुलुक गरिब हुनु आठौं आश्चर्य हो,’ उनले भने।
उनले प्राकृतिक स्रोत, सम्पदाको समुचित प्रयोग गर्न सके देश दश वर्षमा धनी बन्ने बताए।—न्युज एजेन्सी नेपाल