सहरी विकासमन्त्री धनबहादुर बुढाले नयाँ सहर विस्तार आयोजनालाई सरकारले उच्च प्राथमिकतामा राखेको बताएका छन्।
मंगलबार काठमाडौं उपत्यकाभित्र रहेको ईशान कोण नयाँ सहर विस्तार आयोजनाको निरीक्षण गर्दै मन्त्री बुढाले उक्त कुरा बताएका हुन्।
उनका अनुसार बजेट अभावका कारण सहर विस्तारको कार्यक्रम अपेक्षाअनुसार अघि बढ्न सकेको छैन।
'सरकारले व्यवस्थित सहरीकरणको अवधारणलाई विशेष महत्वको रूपमा लिएको छ,' उनले भने, 'सरकारले संघीय राजधानीमा मात्र नभई हिमाल, पहाडी र तराईका जिल्लामा समेत नयाँ सहर आयोजनालाई प्रभावकारी रूपमा अघि बढाएको छ।'
यस्तै, सरकारले पहिचान गरिसकेका ५० बढी स्थानमा नयाँ सहर बनाउने योजनालाई आगामी बजेटमा समेत निरन्तरता दिइएको बताए। सुविधा खोज्ने होडबाजीमा असन्तुलित बसाइँसराइँलाई रोक्न सरकारले देशैभर नयाँ सहरको अवधारणालाई महत्वका साथ हेरेको उनको भनाइ छ।
मन्त्री बुढाले नयाँ सहर विस्तार गर्दा आवश्यक मापदण्ड र पूर्वाधार विकासको तालमेलमा समेत विशेष ध्यान दिन आग्रह गरेका छन्।