उपप्रधान एवं गृहमन्त्री रवि लामिछानेले हरेक व्यक्तिले आफ्नो अधिकार निर्बाध प्रयोग गर्न पाउनु पर्छ भन्नेमा सरकार सचेत रहेको बताएका छन्।
निलहिरा समाज (ब्लु डायमन्ड सोसाइटी) का प्रतिनिधिसँग शुक्रबार सिंहदरबारस्थित कार्यकक्षमा भेटघाट गर्दै उनले त्यस्तो बताएका हुन्।
'यो समाजमा मेरो जति अधिकार छ, तपाईंहरूको पनि त्यति नै छ। हरेक व्यक्तिले आफ्नो अधिकार निर्बाध प्रयोग गर्न पाउनु पर्छ भन्नेमा सचेत छु। सरकार पनि सचेत छ। जुन समाजमा लैंगिक अल्पसंख्यकको सम्मान हुँदैन, त्यो समाज बस्नयोग्य हुँदैन,' उनले भने।
उनले सरकार नागरिकतासम्बन्धी कार्यविधिमा छलफल गर्ने तयारीमा रहेको पनि बताएका छन्।
'उक्त छलफलमा तपाईंहरूलाई पनि निमन्त्रणा गर्छौं। तपाईंहरूका समस्या तपाईंहरूकै प्रतिनिधिबाट सुनेर सरकारले आगामी योजना बनाउनेछ,' उनले भने।
यौनिक तथा लैंगिक अल्पसंख्यक समुदायका प्रतिनिधिले नागरिकता पाउनका लागि झेल्नुपरेको समस्याबारे गृहमन्त्रीलाई ध्यानाकर्षण गराएका थिए। उनीहरूले स्वअनुभूतिका आधारमा नागरिकता पाउने व्यवस्था गर्न मागसमेत गरेका थिए।
त्यस्तै उनीहरूले सुरक्षा निकाय (प्रहरी र सशस्त्र प्रहरी) मा लैंगिक तथा यौनिक अल्पसंख्यकले पनि सहभागिता जनाउन पाउने व्यवस्था गरिदिन आग्रह गरेका थिए।