नेकपा (एकीकृत समाजवादी)का अध्यक्ष माधवकुमार नेपालले पार्टी महाधिवेशनको सम्मुखमा नेता कार्यकर्ताहरूको भेला र छलफल हुने कुरालाई स्वाभाविक रूपमा लिनुपर्ने बताएका छन्।
पार्टीको दशौं राष्ट्रिय महाधिवेशनको तयारीबारे जानकारी दिन शनिबार काठमाडौंमा आयोजना गरिएको पत्रकार सम्मेलनमा बोल्दै अध्यक्ष नेपालले नेता र कार्यकर्ताहरूबीचको भेटलाई स्वाभाविक लिनुपर्ने बताएका हुन्।
उनले पार्टीका सबै नेता, कार्यकर्ताले महाधिवेशनलाई एकतावद्ध भएर सम्पन्न गर्ने संकल्प लिएको समेत बताए।
‘भेला नभएर के गर्छन् त ? घरमा नै लुकेर बस्छन् त कोही ? बस्छन्, कुराकानीहरु हुन्छन । छलफल हुन्छ । कोही रेष्टुराँमा जान्छन्, कोही होटलमा जान्छन्। छलफल गर्छन्। चिया खान्छन्। भेटघाट हुन्छ। यत्रा कार्यकर्ता छन् हामी कहाँ । देशभरीका कार्यकर्ता आउँदा त झन ज्यादा होटलका होटलहरु पनि भरिएका होला,’ उनले भने।
तर गुटबन्दी पार्टी र सिंगो कम्युनिष्ट आन्दोलनका लागि घातक हुने उनले बताए । उनले महाधिवेशनमा नेताहरु एकतावद्ध भएर अघि बढुन् भन्ने नेता, कार्यकर्ताहरुको चाहना प्रशंसनीय रहेको पनि बताए।
गुटबन्दी नहोस् भन्नेबारे आफूहरू पनि सचेत रहेको अध्यक्ष नेपालले बताए।
‘हामी महाधिवेशनलाई एकतावद्ध भएर सम्पन्न गर्ने संकल्प गरेका छौं । नेता, कार्यकर्ताहरु त्यही दिशामा अघि बढिरहनुभएको छ । तयारीको काम लगभग अन्तिम, अन्तिम चरणमा पुगेको छ,’ उनले भने।।