नेकपा (एमाले) का सचिव तथा सांसद गोकर्ण विष्टले लोकतन्त्रको डुंगा प्वाल पार्न खोज्दा सरकारमात्र नडुब्ने गणतन्त्रवादी सबै डुब्ने टिप्पणी गरेका छन्।
प्रतिनिधि सभाको मंगलबारको बैठकमा बोल्दै उनले सबै कुराको जिम्मेवारी सात–आठ महिने सरकारको काँधमा मात्रै राखेर समग्रतामा आफू उम्कन नमिल्ने बताएका हुन्।
‘आज देशमा बेरोजगारी, बढेको छ, देशमा निराशा पनि पैदा भएको छ। आज सुशासनका मामिलामा केही प्रश्नहरू पनि पैदा भएका छन्। तर यी सबै कुराको जिम्मेवारी सात–आठ महिने सरकारको काँधमा मात्रै राखेर समग्रतामा के उहाँ उम्कन मिल्छ र! आज गणतन्त्र र लोकतन्त्रलाई सफल बनाउन चाहने शक्तिहरू हामी एउटै ढुंगामा यात्रा गरिरहेका छौं। आज हामी एकातिर एउटै डुंगामा यात्रा गरिरहेका छौं। तर अर्कोतिर यात्रा गरिरहेको डुंगामा प्वाल पार्नुभयो भने केवल सरकारमा रहने दलहरू मात्रै डुब्ने छैनन्, सबै डुब्नुपर्छ भन्ने कुरालाई उहाँले हेक्का राख्नुपर्छ,’ उनले भने।
आज जुन प्रकारले जनतामा असन्तुष्टि पैदा भएको छ, निराशा पैदा भएको छ, यो सबैको कारण वर्तमान सरकार हो भनेर प्रमुख प्रतिपक्षी दलका नेता पुष्पकमल दाहाल ‘प्रचण्ड’ ले भाष्य बनाउन खोजेको पनि उनले बताए।
‘उहाँले यही ढंगले राख्नका लागि प्रयत्न गर्नुभएको छ। तर उहाँले गणतन्त्र प्राप्ति पछाडि पटकपटक सरकारको नेतृत्व गर्नुभएको छ। गणतन्त्र पछाडि पटकपटक उहाँको पार्टी सरकारमा सहभागी भएको छ। कि राम्रा काम भएका छन् भने त्यसको जस पनि लिनुपर्छ। यदि कहीँ कतै कमजोरी भएका छन् भने त्यसको अपजस पनि लिनुपर्छ,’ उनले भने।
यो कुरामा एउटा जिम्मेवार पार्टीको हैसियतले, एउटा जिम्मेवार नेताको हैसियतले प्रचण्ड जिम्मेवार हुनुपर्ने विष्टको भनाइ थियो।
‘यदि गम्भीर हुन सक्नुहुन्न भने, मर्यादित हुन सक्नुहुन्न भने संविधानको मर्यादाभित्र रहेर उहाँले आफ्ना अभिव्यक्तिहरू दिन सक्नुहुन्न भने कतै यस प्रकारका अभिव्यक्ति र व्यवहारले गणतन्त्र विरोध गर्न चाहने शक्तिहरूलाई, संविधानको उल्लंघन गर्न चाहने शक्तिहरूलाई प्रोत्साहित त गरिरहेको छैन, आज यो प्रश्न उठिरहेको छ,’ उनले भने, ‘आज यसको पनि हामीले गम्भीरताका साथ समीक्षा गर्नुपर्नेछ।’
