उपप्रधानमन्त्रीसमेत रहेका सहरी विकास मन्त्री प्रकाशमान सिंहले आगामी बजेटमा उपत्यकामा समेट्नुपर्ने योजनालगायत विषयमा जनप्रतिनिधिहरूसँग छलफल गरेका छन्।
सहरी विकास मन्त्रालयमा मंगलबार भएको छलफलमा काठमाडौं, भक्तपुर र ललितपुर जिल्लाका स्थानीय तहका प्रमुख तथा उपप्रमुखहरू सहभागी भए।
सो क्रममा उपत्यकालाई कसरी व्यवस्थित र बस्न योग्य सहर बनाउने, उपत्यकाका नदी प्रणाली सुधार्ने, फोहोरमैला र ट्राफिक व्यवस्थापनको समस्या कसरी हल गर्ने भन्ने विषयमा मेयर र उपमेयरहरूले धारणा राखेका थिए।
उपप्रधानमन्त्री सिंहले उपत्यकालाई सफा, स्वच्छ र यहाँ बग्ने नदिहरुलाई सफा बगाउनका लागि तीनै तहका सरकारले मिलेर काम गर्नुपर्ने बताए।
उपत्यकाका नदी प्रणाली स्वस्छ बनाउन सेप्टिक ट्यांक अभियान चलाउनुपर्ने उनले बताए।
सेप्टिक ट्यांक बनाउने कार्यलाई उपत्यकामा अभियानकै रूपमा अगाडि बढाउनुपर्ने उनको भनाइ छ।
