पोखराको पृथ्वीनारायण क्याम्पसमा स्ववियु चुनावअन्तर्गत मतगणना सुरू भएको छ।
आइतबार भएको निर्वाचनको मतगणना सोमबार बिहान ८ बजेबाट सुरू भएको हो।
जारी मतगणनामा नेकप (एमाले) निकट अनेरास्वविुले सुरूआती अग्रता लिएको छ।
१०० मत गन्दा अध्यक्ष पदमा अनेरास्ववियुका विष्णु पोखरेलले ४३ मत प्राप्त गरेका छन्।
नेपाली कांग्रेसनिकट नेविसंघका सुशील न्यौपानेले १८, स्वतन्त्र उम्मेदवार विप्लवी न्यौपानेले १३, अखिल क्रान्तिकारीका नवीन अधिकारीले ८, संयुक्त प्यानलका तर्फबाट सन्तोष पौडेलले ६ र प्राज्ञिक परिषद्का उम्मेदवार दिप्सन सुरूङले ३ मत प्राप्त गरेका छन्। अध्यक्षका अर्का स्वतन्त्र उम्मेदवार कमल सुवेदीले ४ मत ल्याएका छन्।
सचिवमा एमाले अखिलका विराट दुवाडीले ५० मत ल्याएका छन्। कोषाध्यक्ष सन्दीपा गुरूङले ५३ मत ल्याएर अग्रता लिइरहेकी छन्।
पिएन क्याम्पसमा चैत ५ गते नै स्ववियु निर्वाचन तय भएको थियो।
तर मतपत्रमा अखिल छैठौंको मत संकेत गर्ने ठाउँमा कोष्ठक चिह्न नै नभेटिएपछि मतदान रोकिएको थियो।
आइतबार भएको मतदानमा २९८७ विद्यार्थीले मतदान गरेका थिए। देशकै ठूलो क्याम्पस पिएनमा ९२७० जना विद्यार्थी अध्ययनरत छन्।
