जापानका कृषिमन्त्री ताकु इतोले राजीनामा दिएका छन्।
जापानमा चामलको भाउ बढेर तीन वर्षयताकै उच्च बिन्दुमा पुगेका बेला असंवेदनशील टिप्पणी गरेको विषयमा जनआक्रोश बढेपछि कृषि मन्त्री इतोले राजीनामा दिएका हुन्।
गत अप्रिलमा चामलको भाउ सन् २०२४ को अप्रिलको तुलनामा झन्डै दोब्बर बढेको थियो।
त्यतिबेला कृषिमन्त्री इतोले आफूले कहिल्यै चामल नकिनेको कारण भाउ थाहा नहुने बताएका थिए।
'म आफैले कहिल्यै चामल किन्दिनँ। मेरा समर्थकहरूले मलाई यति धेरै दिन्छन् कि म त्यसलाई बेच्न पनि सक्छु,' सागा प्रिफेक्चरमा आयोजित पार्टीको कार्यक्रममा इतोले भनेका थिए।
चामलको भाउ बढेर मारमा परेका नागरिकहरूले उनको सो अभिव्यक्तिपछि सरकारको चर्को आलोचना गरेका थिए।
प्रधानमन्त्री सिगेरु इसिबाले पनि कृषिमन्त्रीको अभिव्यक्तिको निन्दा गरेपछि इतोले बुधबार राजीनामा दिएका हुन्।
'मैले जनाताको भावना बुझ्न सकिनँ। त्यसकारण सरकारको नीति लागु गर्ने ठाउँमा बसिरहन मेरो नैतिकताले दिँदैन,' प्रधानमन्त्रीलाई राजीनामा बुझाइसकेपछि पत्रकारहरूसँग बोल्दै उनले भने।
प्रधानमन्त्री इशिबाले इतोका ठाउँमा पूर्व वातावरणमन्त्री सिन्जिरो कोइजुमीलाई कृषिमन्त्री बनाउने तयारी गरेका छन्।
