राष्ट्रिय स्वतन्त्र पार्टी (रास्वपा) ले जेठ २३ गतेबाट जनयात्रा सुरू गर्ने भएको छ। बिहीबार बसेको जनयात्रा संयोजन समितिको बैठकले झापाको मेचीनगरबाट जनयात्रा सुरू गर्ने निर्णय गरिएको प्रवक्ता निशा डाँगीले जानकारी दिइन्।
उनका अनुसार आज बसेको बैठकले जनयात्राको सन्दर्भमा तीनवटा निष्कर्ष निकालेको छ। पहिलो, जनयात्रा जेठ २३ गतेबाट सुरू गर्ने, दोस्रो जनयात्रा झापाबाटै सुरू गर्ने र तेस्रो जनयात्रालाई स्थानीय स्तरसम्म लैजाने निर्णय गरिएको उनले बताइन्।
‘जनयात्रामा पार्टीका कार्यवाहक सभापति, उपसभापति, महासचिव, सम्बन्धित जिल्लाका सांसदहरू, सम्बन्धित प्रदेश इन्चार्ज सभापति र जिल्ला सभापति लगायत स्थानीय समितिका पदाधिकारी पनि रहनुहुनेछ। झापाबाट अभियान सुरू गरेपछि त्यसक्रममा केन्द्रीय संयोजन समितिकै तर्फबाट केही पालिकामा अभियान लैजानेछौं। केन्द्रीय टोली पुग्न नसकेका पालिकामा स्थानीय समितिहरूले नै अभियानलाई निरन्तरता दिँदै गाउँ–टोलसम्म लैजान सक्नुहुनेछ, त्यही अनुसार योजना बनाइएको छ,’ उनले भनिन्।
उनले सभा, सम्मेलन, कोण सभा भन्दा पनि जनयात्रा समस्या संकलन र समाधानमा केन्द्रित रहने योजना रहेको बताइन्। यद्यपि केन्द्रीय संयोजन समितिका तर्फबाट अभियानको कार्यविधि नै तय गरिएको छ।
‘स्थानीयस्तरमा त्यहाँका नागरिकले व्यहोरिरहेका समस्या, त्यसलाई कसरी समाधान गर्ने भनेर बहस–विमर्श गर्नेछौं। त्यसलाई सूत्रबद्ध गर्दै माग–ध्यानाकर्षणका रूपमा सरकारलाई बुझाउँछौं र सदनमा छलफल पनि गर्छौं पनि,’ उनले भनिन्।
रास्वपाले गत चैत २३ गते चितवनमा जनयात्राको उद्घाटन गरिसकेको छ। पार्टी सभापति रवि लामिछानेले नै अभियानलाई सुरू गर्ने भने पनि उनी चैत २२ गते पक्राउ परी जेल चलान भएका थिए।
त्यसपछि रास्वपाले चितवनमा अभियान सुरू गरेर अघि बढाएको थिएन। रास्वपाभित्र पश्चिमबाट जनयात्रा थाल्ने कि पूर्व जाने भन्ने बहस पनि थियो। प्रदेश इन्चार्ज, सांसद र केन्द्रीय नेतासँगको छलफल, परामर्शपछि पूर्वबाटै जनयात्रा थाल्ने निष्कर्ष निकालेको हो।
अभियानको संयोजन गर्ने जिम्मा संसदीय दलका उपनेता विराजभक्त श्रेष्ठलाई दिइएको छ। उपसंयोजकको जिम्मेवारी डा. तोसिमा कार्कीले पाएकी छन्।
