बेलायतकी अर्थमन्त्री रेचल रीभ्स संसदमै रोएकी छन्।
उनले पेस गरेको कल्याणकारी सुविधासम्बन्धी विधेयक सत्तारूढ दलकै सांसदहरूका कारण मंगलबार विफल भएको थियो।
ठूलो सङ्ख्यामा युवाहरूले मानसिक स्वास्थ्यको कारण देखाउँदै सरकारबाट सुविधा दाबी गरेकाले पछिल्ला केही वर्षमा बेलायती राज्यकोषमा ठूलो भार बढ्दै गइरहेको छ। सरकारी खर्च कटौती गर्न उनले त्यसमा कडाइ गर्ने सो विधेयकमा गर्ने प्रस्ताव गरेकी थिइन्। तर, सत्तारूढ लेबर पार्टीकै सांसदले कमजोर नागरिकहरूलाई नोक्सान पुर्याएको भन्दै सो विधेयकलाई विफल पारे।
उनले सो व्यवस्था तुरून्तै लागू नगर्ने भनेर संशोधन गरेपछि मात्रै सो विधेयक संसदबाट पारित भएको थियो। आर्थिक समस्या खेपिरहेको समयमा यसले उनको बजेटमा ठूलो असर पार्ने भएकाले उनी तनावमा छिन्।
यस्तो समयमा बुधबार प्रधानमन्त्री कियर स्टार्मरले सांसदले उठाएका प्रश्नको जबाफ दिने क्रममा संसदमै उनी रोएकी हुन्।
हाउस अफ कमन्समा प्रधानमन्त्रीसँगको सवाल-जबाफका क्रममा अर्थमन्त्रीको पनि विपक्षी सांसदले कडा शब्दमा आलोचना गरेका थिए। सो सत्रभरी नै थकित र तनावमा देखिएकी रीभ्स प्रधानमन्त्री बोलिरहेको समयमा आँसु पुछेको थिइन्।
केही लेबर सांसदले रीभ्सको सभामुखसँग झगडा परेकाले उनी रोएको भनेर बेलायती मिडियामा समाचार आएका छन्।
उनको सचिवालयले यसलाई व्यक्तिगत मामिला भनेर थप टिप्पणी गर्न मानेनन्। तर, आर्थिक समस्याका बेलामा सत्तारूढ सांसदले समेत उनको साथ नदिएकाले पनि उनलाई प्रभाव पारेको देखिन्छ।
सो घटनापछि प्रधानमन्त्री स्टार्मरले उनको समर्थन गर्दै उनी पूर्ण कार्यकाल अर्थमन्त्री रहने बताएका छन्।
‘उनी र म सँगै काम गर्छौं, हामी सँगै सोच्छौं,’ स्टार्मरले भने, ‘विगतमा यस्ता उदाहरणहरू छन् – म विस्तृतमा जान्नँ– जहाँ चान्सलर र प्रधानमन्त्रीहरू एकअर्कासँग तालमेलमा थिएनन्। तर, हामी तालमेलमा छौं।’
रीभ्स रोएको पनि राजनीतिक कारणले नभएर व्यक्तिगत मामिला भएको स्टार्मरले दाबी गरेका छन्।
‘त्यो सरासर गलत हो,’ उनले सो घटनालाई राजनीतिसँग जोडेकोबारे भने, ‘यो हप्ता जे भयो, त्यससँग यसको कुनै सम्बन्ध छैन। त्यो उनको व्यक्तिगत मामिला थियो, म तपाईंसँग कुरा गरेर उनको गोपनीयतामाथि हस्तक्षेप गर्न चाहन्नँ।’
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1746009348.jpg)
