नेपाली कांग्रेसका महामन्त्री गगनकुमार थापाले देशमा केही राम्रो भएपनि भने जति गर्न नसकेको बताएका छन्।
शनिबार काठमाडौंमा आयोजित एक कार्यक्रममा देशले एकदमै राम्रो गरेको भन्ने भनाइ र बर्बाद नै भएको भन्ने भनाइ दुबै नपत्याउन उनले विद्यार्थीहरूलाई आग्रह गरेका हुन्।
उनले आफूले अध्ययन गरेर मात्रै समर्थन र विरोध गर्न पनि सुझाव दिए।
‘कसैले यो देशमा खतरा (राम्रो) गरेको छ, भएको छ भनेर नपत्याउनुस्। तर कसैले आएर यो देश बर्बाद भयो, झुर भयो भनेर पनि नपत्याउनुस्। दुई वटै रङ। यो देशमा केही राम्रो भएको छ। केही राम्रो गर्न सकिएको छैन,’ उनले भने, ‘राम्रो गरेकोमा धन्यवाद भन्नुस्। गर्नुपर्ने जति राम्रो किन गरिनस् भनेर गाली पनि गर्नुस्। बाँकी रहेको म गर्छु भनेर जिम्मा लिनुस् न।’
उनले नयाँ नयाँ कुरा सिकेर प्रश्न गर्न पनि विद्यार्थीहरूलाई सुझाव दिए।
‘नथाक्नुस्, नभाग्नुस्। नगल्नुस्। अडिएर बस्नुस्। नयाँ कुरा सिक्नुस्, क्वेशन गर्नुस्। क्रिटिकल हुनुस्, रमाइलो पनि गर्नुस्,’ उनले भने।
महामन्त्री थापाले अब आउने पुस्ताले आफूले भन्दा राम्रो काम गर्ने आफूलाई विश्वास रहेको बताए।
—न्युज एजेन्सी नेपाल
-1746009348.jpg)
