सुदूरपश्चिम प्रदेशका मुख्यमन्त्री कमलबहादुर शाहले नागरिक उन्मुक्ति पार्टीका संरक्षक रेशमलाल चौधरीलाई आइबार बिहान बर्दियास्थित घरमै गएर भेटेका छन् ।
‘उहाँ आज बिहान मेरो घरमा आउनु भएको थियो,’ रेशमले भने ‘ उहाँले सरकारको कुरा गर्नु भयो, यस्तै कुराकानी भयो।’
मुख्यमन्त्री शाहले बिहीबार मात्रै नागरिक उन्मुक्ति पार्टीबाट उद्योग, पर्यटन, वन तथा वातावरण मन्त्री रहेका रामेश्वर चौधरीलाई बर्खास्त गरेका थिए।
मुख्यमन्त्री शाहले असार ५ गते नै मन्त्री चौधरीलाई राजीनामा दिन आग्रह गरेका थिए। तर चौधरीले राजीनामा नदिएपछि उनलाई बर्खास्त गरेका थिए।
कृषकका लागि अनुदानमा वितरण गरिएको पावर टिलर (जोत्ने हाते ट्र्याक्टर) का विषयमा लेनदेन गरेको आरोप लागेपछि मन्त्री चौधरीलाई मुख्यमन्त्री शाहले पदबाट बर्खास्त गरेको स्रोत बताउँछ।
यो बीचमा नागरिक उन्मुक्तिले सरकारलाई दिएको समर्थन फिर्ता लिने निर्णय गरिसकेको छ । उसले संघ र सुदूरपश्चिम प्रदेश सरकारलाई दिएको समर्थन फिर्ता लिएर प्रतिपक्षमा बस्ने निर्णय गरिसकेको छ।
आइतबार सभामुख देवराज घिमिरेसमक्ष नाउपाले सरकारलाई दिएको समर्थन फिर्ता लिएर प्रतिनिधि सभामा प्रतिपक्षी सिटमा बस्ने जानकारी दिइसकेको छ। यद्यपि नाउपाबाट संस्कृति पर्यटन तथा नागरिक उड्डयन राज्यमन्त्री रहेका अरूण चौधरीले राजीनामा दिइसकेका छैनन्।
आइतबार बिहान मुख्यमन्त्री शाहसँगको भेटबारे हामीले रेशम चौधरीलाई सोधेका छौं। चौधरीले सरकारका विषयमा पार्टीले नै स्पष्ट निर्णय गरिसकेको बताए।
अर्कै ब्यक्तिलाई मन्त्री पठाउन तपाँइलाई आग्रह गर्नु भएको हो?,' भन्ने प्रश्नमा उनले भने, ' म पार्टीको मुख्य मान्छे होइन। त्यसमाथि अब प्रतिपक्षमा बस्ने निर्णय पनि भइसकेको छ।'
पार्टीको त्यही निर्णय आफूले मुख्यमन्त्रीलाई सुनाएको चौधरीले बताए।
कांग्रेस सभापति शेरबहादुर देउवाको आग्रहमा मुख्यमन्त्री शाह रेशमलाई भेट्न गएका थिए।
‘मुख्यमन्त्रीजी ले यो बीचमा आफ्नो सभापतिलाई भेट्नु भएको रहेछ,’ चौधरीले भने ‘ देउवाले त्यसक्रममा मुख्यमन्त्रीलाई रेशम जी राजनीतिकर्मी हो उहाँलाई लाई भेटेर कुरा मिलाउनुहोस भन्नु भएको रहेछ।’
त्यसमा आफूले स्पष्ट जबाफ दिएको उनले बताए।
‘मैले कहिलै दायाँ बाँया कुरा गर्छु र म दायाँ बाँया कुरा गर्दिन। सरकारमा बस्नु अहिले उचित छैन भन्ने नै हो,’ उनले भने।
सरकारको नेतृत्व गरेका दलहरूले सहमति कार्यान्वयन नगरेको उनले बताए।
'त्यसकारणले सरकारमै बसिरहनु भन्दा चुपचाप लागेर आफ्नो प्रतिपक्षमा बस्ने, नागरिकका कुरा उठाउने नै राम्रो हुन्छ भन्ने निष्कर्ष हो,' उनले भने
उनले संघीय सरकारमा रहेका मन्त्रीले पनि साँझसम्म राजीनामा दिने बताए।
सुदुरपश्चिममा मुख्यमन्त्री शाहले पनि आफूले आइतबार बिहान बर्दियास्थित घरमै पुगेर नाउपा संरक्षक चौधरीलाई भेटेको बताए।
उनले भेटमा सामान्य राजनीतिक विषयमा छलफल भएको बताए। उनले सरकारमा अर्कै मन्त्री पठाउन आग्रह गरिएको पनि बताए।
‘नागरिक उन्मुक्तिकै लागि त्यो मन्त्रालय हिजो पनि थियो र अहिले पनि छ । उहाँले सांसदको नाम दिनुभयो भने जुनसकुकै समय पनि सपथ खुवाउन सकिन्छ,’ मुख्यमन्त्री शाहले भने।
आफूले यही प्रस्ताव राख्दा चौधरीले भने पार्टीको संघदेखि प्रदेशहरूमा पनि समर्थन फिर्ता लिने निर्णय भएअनुसार नै अगाडि बढेको बताएको मुख्यमन्त्री शाहले भने।
‘उहाँको भनाइ केन्द्रदेखि प्रदेशहरुमा पनि समर्थन फिर्ता लिने कुरा छ र त्यही लाइनमा हामी अगाडि बढेका छौं भन्ने थियो , तर थप छलफल र संवादहरु गर्दै गरौंला भन्ने कुरा भएको छ,’ शाहले भने ।
-1746009348.jpg)
