नेपाली कांग्रेसले महाधिवेशन गर्न नसकेका भ्रातृ संस्थाका तदर्थ समितिले चैत मसान्तपछि गरेका सबै निर्णय खारेज गरिदिएको छ।
कांग्रेसले नेविसंघ, तरूण दल, महिला संघलगायत १३ भ्रातृ संस्थालाई चैत मसान्तभित्र महाधिवेशन गर्न भनेको थियो। तर ५ भ्रातृ संस्थाले मात्रै महाधिवेशन गरेका थिए।
महाधिवेशन गर्न नसक्ने भ्रातृ संस्थाका तदर्थ समितिले चैत मसान्तपछि गरेका सबै निर्णय सोमबारको कांग्रेस केन्द्रीय कार्यसमितिले खारेज गरिदिएको हो।
‘सबै तदर्थ समितिले २०८१ चैत्र मसान्त पछि गरेका सबै निर्णय खारेज गर्ने निर्णय केन्द्रीय समितिले गरेको छ,’ मुख्यसचिव कृष्णप्रसाद पौडेलले भने।
तदर्थ समिति गठन गरिएका भ्रातृ संघसंस्थामध्ये हालसम्म पनि नेपाल महिला संघ, नेपाल तरूण दल, नेपाल विद्यार्थी संघ, नेपाल दलित संघ, नेपाल किसान महासंघ, नेपाल थारू संघ र नेपाल लोकतान्त्रिक खेलकूद संघले चैत मसान्तभित्र महाधिवेशन गर्न सकेका थिएनन्।
‘२०८१ चैत्र मसान्तभित्र महाधिवेशन गर्नै पर्ने र गर्न नसकेमा स्वतः पदावधि समाप्त हुने भनि अन्तिम समय दिइएकोमा यस बैठकमा महाधिवेशनको कार्यतालिका प्रस्तुत गरेका भ्रातृ संघहरूको हकमा कार्यतालिकामा तोकिएको मितिसम्म समयावधि थप गर्ने’ निर्णय भएको मुख्यसचिव पौडेलको भनाइ छ।
साथै सबै तदर्थ समितिले २०८१ चैत्र मसान्त पछि गरेका सबै निर्णय खारेज गर्ने र कार्यतालिका प्रस्तुत गर्न नसकेको नेपाल दलित संघका सम्बन्धमा केन्द्रीय महाधिवेशन निर्देशन समिति र संघका अध्यक्षबीच छलफल गरी यथाशीघ्र महाधिवेशनको कार्यतालिका प्रस्तुत गर्न निर्देश गर्ने निर्णय भएको उनले बताए।
‘प्रस्तावित कार्यतालिका बमोजिम महाधिवेशन सम्पन्न गर्न निर्देशक समितिलाई पार्टीको तर्फबाट सम्पूर्ण जिम्मेवारी प्रदान गरी निर्देशन समितिले गर्नुपर्ने कामका सन्दर्भमा पार्टीको तर्फबाट कार्यादेश उपलब्ध गराउनेछ,’ केन्द्रीय समितिको निर्णयमा भनिएको छ, ‘महाधिवेशन तयारी र व्यबस्थापनमा सहजीकरणका लागि पार्टीले सम्बन्धित संघको मौजुदा तदर्थ समितिका अध्यक्ष सहित महाधिवेशन व्यवस्थापन समिति बनाउनेछ।’
तोकिएको समयमा महाधिवेशन सम्पन्न गर्न पार्टीका प्रदेश, जिल्ला लगायतका सबै तहगत समिति र अन्य सम्बन्धित सबैले निर्देशन समितिलाई आवश्यक समन्वय, सहयोग र सहजीकरण गर्नुपर्ने पनि निर्णयमा उल्लेख छ।
साथै कांग्रेस केन्द्रीय नीति, अनुसन्धान तथा प्रशिक्षण प्रतिष्ठानको निर्देशिका संशोधन प्रस्ताव २०८२ र नेपाली कांग्रेस जनप्रतिनिधि कार्यसम्पादन निर्देशिका २०८२ परिमार्जनसहित केन्द्रीय समितिबाट पारित भएको छ।
कांग्रेसको शुभेच्छुक संस्थाको रूपमा मान्यता प्राप्त “नेपाल लोकतान्त्रिक यातायात व्यवसायी संघ” र “नेपाल लोकतान्त्रिक संस्थागत तथा निजी विद्यालय शिक्षक संघ” (निस्टा) ले संघको नाममा संशोधन गर्न दिएको निवेदनअनुसार उक्त संस्थाहरूको नाम “नेपाल प्रजातान्त्रिक राष्ट्रिय यातायात व्यवसायी संघ” र “नेपाल संस्थागत तथा निजी शिक्षालय अध्यापक संघ” रहने गरी संशोधन गरिएको मुख्यसचिव पौडेलले बताए।
केन्द्रीय समितिले नेपाल विद्यार्थी संघ र नेपाल प्रजातान्त्रिक राष्ट्रिय यातायात व्यवसायी संघको विधान परिमार्जनसहित पारित गरेको पनि उनले जानकारी दिए।
-1746009348.jpg)
