सरकारले रसुवागढीस्थित नेपाल–चीन जोड्ने मितेरी पुल बनाउन र चीनतर्फको बाटो पुनर्निर्माण गरी केरूङ नाका सञ्चालनमा ल्याउन चीनसँग समन्वय गर्ने निर्णय गरेको छ।
राष्ट्रिय विपद् जोखिम न्यूनीकरण तथा व्यवस्थापन परिषदको मंगलबारको बैठकले यो निर्णय गरेको हो। प्रधानमन्त्री तथा परिषदका अध्यक्ष केपी शर्मा ओलीको अध्यक्षतामा बैठक बसेको थियो।
रसुवागढीमा मंगलबार आएको आकस्मिक बाढीले भोटेकोशी नदीमा रहेको उक्त पुल बगाएपछि आवागमन बन्द भएको छ।
त्यहाँको स्थलगत अवलोकनबाट फर्केलगत्तै राखिएको परिषद बैठकमा प्रधानमन्त्री ओलीले मितेरी पुलमा तत्काल बेलिब्रिज बनाएर भए पनि नाकाको बाटो सञ्चालनमा ल्याउन चिनियाँ राजदूतलाई आग्रह गरेको जानकारी दिए।
बैठकले सडक पूर्वाधार सञ्चालनको व्यवस्था मिलाउन भौतिक पूर्वाधार तथा यातायात मन्त्रालयलाई निर्देशन दिनुका साथै चीनसँगका वैकल्पिक नाका सञ्चालन निम्ति आवश्यक तयारी गर्ने निर्णय पनि गरेको छ।
क्षतिग्रस्त भन्सार, अध्यागमन, जलविद्युत् आयोजनाका पूर्वाधारको शीघ्र मर्मत गरी सञ्चालनको व्यवस्था मिलाउन सम्बन्धित मन्त्रालयलाई निर्देशन दिइएको छ। व्यवसायीका कन्टेनर, सवारी साधन र अन्य सामग्रीमा भएको क्षतिको बीमा लगायत अन्य प्रक्रियामा सहजीकरणको व्यवस्था मिलाउन अर्थ मन्त्रालयलाई निर्देशन दिइएको परिषदले जनाएको छ।
रसुवागढीको आकस्मिक बाढीमा बेपत्ता व्यक्तिहरूको खोजी र उद्धारलाई थप प्रभावकारी बनाउन सम्बन्धित निकायलाई निर्देशन पनि दिइएको छ।
परिषद बैठकले घटनामा मृतक र बेपत्ता परिवारलाई कानुनअनुसार तत्काल राहत उपलब्ध गराउने व्यवस्था गृह मन्त्रालयले मिलाउने र घाइतेहरूको निःशुल्क उपचारको व्यवस्था स्वास्थ्य तथा जनसंख्या मन्त्रालयले गर्ने निर्णय गरेको छ।
यो वर्ष सरदरभन्दा बढी वर्षा हुने पूर्वानुमान आएकाले पूर्वतयारी तथा प्रतिकार्यका लागि सजग एवं तयार रहन बैठकले सम्बन्धित निकायलाई निर्देशन गरेको छ।
-1746009348.jpg)
