पार्टीको केन्द्रीय अनुशासन आयोगले आफ्ना समूहका नेता–कार्यकर्तालाई छानी–छानी कारबाही गरेको भन्दै नेपाली कांग्रेसको संस्थापनइतर समूह रूष्ट बनेको छ।
संस्थापनइतर समूहका नेता डा. शेखर कोइराला बिसन्चो भएर आराम गरेर बसिरहेका छन्।
कोइरालाले यसबारे केन्द्रीय समिति बैठकमै असन्तोष जनाइसकेका छन्।
अनुशासनको कारबाहीमा परेकाहरूको सूची सार्वजनिक भएपछि शेखर समूहका नेताहरूले तीव्र असन्तोष प्रकट गरेका हुन्।
२०७९ सालमा भएको स्थानीय तह, प्रदेश सभा र प्रतिनिधि सभा निर्वाचनमा पार्टीका आधिकारिक उम्मेदवारहरूलाई असहयोग गरेको भन्दै १८ जनामाथि अनुशासन कारबाही गर्दा धेरैजसो कोइराला समूहका नेताहरू परेका छन्।
‘कारबाही भोग्ने धेरै नेताहरू महाधिवेशनमा हाम्रो पक्षमा उभिएका नेताहरू हुनुहुन्छ,’ कोइराला निकट नेता गुरूराज घिमिरेले सेतोपाटीसँग भने, ‘अनुशासन समितिले गरेको कारबाहीको सूची हेर्दै पनि यो कारबाही समयोचित नभएको देखिन्छ।’
आनन्दप्रसाद ढुंगाना नेतृत्वमा रहेको पाँच सदस्यीय अनुशासन समितिका तीन जनाले मात्रै सहमति गरेर यो कारबाही भएको नेता घिमिरेले आरोप लगाएका छन्।
अनुशासन समिति सदस्यहरू राजीव कोइराला र सन्जय गौतमले यो निर्णयमा कडा असहमति प्रकट गरेको घिमिरेको भनाइ छ।
उनीहरू दुवै जना संस्थापनइतर समूहका हुन्।
कारबाहीको पक्षमा संयोजक ढुंगानासहित ईश्वरी न्यौपाने र ध्रुव वाग्ले उभिएको उनको भनाइ छ।
‘समितिका दुई सदस्यले समितिमा दर्ज गरेको असहमतिका आधारमा म यो भनिरहेको छु,’ नेता घिमिरेले भने, ‘पार्टीमा दण्ड र पुरस्कारको व्यवस्था हुन्छ, हुनुपर्छ। तर, अनुशासनको कारबाही कुन बेला, कुन कसुरका लागि भन्ने कुरा प्रष्ट हुनुपर्छ। निर्वाचन सकिएको साढे २ वर्षपछि त्यही निहुँमा निष्कासन र निलम्बनको कारबाही गरिनु बेमौसमको बाजा हो। यसले पार्टीको हित गर्दैन।’
अनुशासन समितिमा रहेका कोइराला समूहका दुई सदस्यले सबैलाई सचेत मात्रै गराउनुपर्ने बताएको तर बहुमतका नाममा कठोर कारबाही गरिएको घिमिरेको दाबी छ।
अनुशासन समितिबाट लामो अवधिको निष्कासनमा परेका सबै नेता शेखर कोइराला निकटहरू छन्।
तेह्रथुम जिल्लाका महासमिति सदस्य तुलसी सुब्बा, कास्की जिल्लाका महासमिति सदस्य एवं गण्डकी प्रदेशका पूर्वमन्त्री कुमार खड्का, लुम्बिनी प्रदेशका महामन्त्री विक्रम खनाल, खोटाङ जिल्लाका सभापति विष्णुकमार राई, पर्सा जिल्ला क्षेत्र नं १ का क्षेत्रीय सभापति अरविन्दकुमार गुप्ता सबै शेखर समूहका हुन्।
तीन महिनाको निलम्बन भोगेका कांग्रेस कास्कीका निवर्तमान सभापति कृष्ण केसी पनि कोइराला समूहकै नेता हुन्।
‘यही सूचीले पनि कारबाही कसरी भएको छ भन्ने देखाउँछ,’ नेता घिमिरेले भने, ‘निर्वाचन सकिएको अढाई वर्षपछि निर्वाचनको निहुँमा कारबाही गरिनु गलत छ। पार्टीलाई एकढिक्का बनाएर अघि बढ्नुपर्ने बेलामा अहिले जे गरिएको छ यसलाई तुरून्त फिर्ता लिनुपर्छ।’
शेखर समूहका मुखर नेतामा गनिने घिमिरेलाई हामीले यो तपाईंको व्यक्तिगत धारणा मात्रै हो कि सिंगो शेखर समूहकै हो भनेर पनि सोधेका थियौं।जबाफमा नेता घिमिरेले भने, ‘यो अहिले हाम्रो प्रारम्भिक धारणा हो। अब हामीभित्र छलफल हुन्छ।’
घिमिरेले पार्टीमा अनुशासन कायम हुनुपर्ने विषयमा दुई मत नहुने भन्दै तर त्यसका लागि समयमै पार्टीले एक्सन लिनुपर्ने बताए।
‘जो–जो माथि कारबाही भएको छ, उहाँहरूविरूद्ध उजुरी पर्ने बित्तिकै अनुशासन समितिले छानबिन गर्ने, कारबाही गर्ने गर्नुपथ्र्यो। यदि यही कारबाही सुरूमै भएको भए साथीहरू कारबाहीमुक्त भएर अहिले पार्टी काममा फर्किसकेका हुने थिए। धेरै विद्रोहीहरूले आममाफी पाइसकेका बेला असमयमा यस्तो कारबाही हुँदा यसले पार्टीलाई हित गर्दैन।’
पार्टीबाट एक वर्षका लागि निष्कासनमा परेका खोटाङका सभापति विष्णुकुमार राईले प्रदेशसभा निर्वाचनमा एकीकृत समाजवादीका उम्मेदवार वीरबल राईलाई सघाएका थिएनन्।
कांग्रेसकै एक कार्यकर्तालाई बागी उठाएका थिए। केन्द्रीय समिति बैठकमा पार्टी बाहिरकालाई असहयोग गरेको आरोप खेपेकाहरूलाई कारबाही गर्न नहुने आवाज उठेको थियो।
-1746009348.jpg)
