पूर्वराष्ट्रपति विद्यादेवी भण्डारीले नेकपा एमाले नीति सिद्धान्त र कार्यक्रमका आधारमा चल्ने संस्था भएको बताउँदै ‘पार्टी भित्र थुप्रै योग्य व्यक्तित्वहरू हुनुहुन्छ’ भन्ने आशा गरेर अघि बढ्नुपर्ने बताएकी छन्।
मंगलबार मदन भण्डारी फाउण्डेशनले अनामनगरमा आयोजना गरेको पत्रकार सम्मेलनमा पत्रकारहरूले उठाएका प्रश्नको जबाफ दिने क्रममा पूर्वराष्ट्रपति भण्डारीले पार्टीमा कहिलेकाहीँ व्यक्तिको अभाव हुनसक्ने, तर अरू थुप्रै योग्यहरू हुन्छन् भन्ने आशा गर्नुपर्ने बताएकी हुन्।
प्रधानमन्त्रीसमेत रहेका अध्यक्ष केपी शर्मा ओलीको अनिच्छाका बाबजुद नेकपा एमालेको सक्रिय राजनीतिमा फर्केको घोषणा गरेकी पूर्वराष्ट्रपति भण्डारीको पुनरागमनलाई लिएर यतिबेला एमालेभित्र र बाहिर बहस चलिरहेको छ। यही क्रममा प्रधानमन्त्री ओलीले ‘एमाले बिनाको देश र ओली बिनाको एमाले’ देख्न चाहनेहरूको सपना पूरा नहुने अभिव्यक्ति दिएका थिए।
भण्डारीलाई पत्रकारहरूले यही प्रसंगबारे प्रश्न गरेका थिए। त्यसक्रममा उनले ओलीको भनाइको घुमाउरो प्रतिवाद समेत गरेकी छन्।
‘पार्टी भनेको एउटा दर्शन, विचार, नीति सिद्धान्त र कार्यक्रमले चलेको हुन्छ। त्यसलाई राम्रोसँग संस्थागत ढंगले अगाडि बढाउनुपर्छ,’ उनले भनिन्, ‘कहिलेकाहीँ व्यक्तिहरूको अभाव हुनसक्छ। तर, पनि हामीसँग थुप्रै योग्य व्यक्तित्वहरू हुनुहुन्छ भन्ने आशा राखेर नै अगाडि बढ्नुपर्छ।’
मदन भण्डारी पत्नीसमेत रहेकी भण्डारीले उनी पछि पनि पार्टी चलेर यहाँसम्म आइपुगेको संकेत समेत गरिन्।
जनताको बहुदलीय जनवादको विजारोपण, सूत्रीकरण र त्यसलाई एउटा सिद्धान्तको रूपमा अघि बढाउने कुरामा मदन भण्डारीले काम गरेको तर उनले लागू गर्न नपाएको पनि उनले बताइन्।
‘उहाँले लागू गर्न पाउनुभएन। उहाँको रहस्यमय निधन भयो। त्यो घटना अहिले पनि अनुत्तरित प्रश्न भएर रहेको छ,’ भण्डारीको भनाइ थियो, ‘तर, पनि पार्टी अगाडि बढ्यो। पार्टीले आफ्नो सिद्धान्त अनुसार यो ठाउँसम्म आइपुगेको छ।’
भण्डारीले भदौमा हुने पार्टीको विधान महाधिवेशनमा आफ्नो सहभागिताबारे केन्द्रीय कमिटीले छलफल अघि बढाओस् भन्ने चाहेको पनि बताएकी छन्। एमालेको विधान महाधिवेशनमा सौराहाको दशौं महाधिवेशनका प्रतिनिधि मात्रै सामेल हुन पाउने वैधानिक व्यवस्था छ।
उक्त महाधिवेशनमा भण्डारी सहभागी थिइनन्। यही सन्दर्भमा पत्रकारहरूले राखेको जिज्ञासामा उनले छलफल होस् भन्ने चाहेको बताएकी हुन्।
‘पार्टीभित्रको कुन संरचनामा के भूमिका हुने भन्ने कुरा माथिल्लो तहको नेतृत्वले तय गर्ने हो,’ महाधिवेशन नहुँदाको अवस्थामा केन्द्रीय कमिटी नै सर्वोच्च निकाय भएको उल्लेख गर्दै उनले भनिन्, ‘केन्द्रीय कमिटीले के निर्णय गर्छ, कस्तो जिम्मेवारी दिन्छ, त्यसमा भर पर्छ। विधान महाधिवेशनमा भाग लिने भन्ने विषयमा चाहिँ सिद्धान्ततः विधान महाधिवेशनमा दशौंका प्रतिनिधिहरूले भाग लिने हुन्। तर, केन्द्रीय कमिटीमा थपिएकाहरूबारे पार्टीले छलफल गर्ला नै। अहिले जिल्ला अधिवेशनहरू भएका छन्, जनवर्गीय संगठनहरूमा पनि लोकतान्त्रिक अभ्यास भएका छन्।’
उनले थपेकी थिइन्, ‘जिल्लामा, जनवर्गीय संगठनमा अहिलेको नेतृत्व थिए कि थिएनन् पार्टीले छलफल गर्छ होला। जनसंगठनहरूको पनि अधिवेशन र सम्मेलन भएका छन्। दशौं महाधिवेशनका प्रतिनिधिहरू अहिले जनसंगठनमा कति आउन सक्नुभयो, कति सक्नुभएन। नयाँ आएकाहरूको प्रतिनिधित्व कसरी हुन्छ, केन्द्रीय कमिटीको छलफल हुनेछ भन्ने लाग्छ। मेरो यहाँबाट यही सल्लाह हुनेछ।’
संविधान महाविधेशनमा आफ्नो व्यक्तिगत उपस्थितिबारे पार्टीले गर्ने निर्णयमा भर पर्ने उनले बताएकी छन्।
‘मेरो उपस्थिति कसरी हुन्छ भन्ने केन्द्रीय कमिटीले तय गर्ला,’ उनले भनिन्, ‘प्रतिनिधिका रूपमा हुन्छ वा आमन्त्रितमा, यही गर्नुपर्छ भन्ने छैन।’
यसबारे केन्द्रले धारण बनाउनेछ भन्ने आशा उनले प्रकट गरेकी छन्।
भण्डारीले यस्तो अभिव्यक्ति ठीक त्यस्तो समयमा दिएकी छन्, जब एमाले पोलिटब्यूरो र केन्द्रीय कमिटी बैठकको मुखैमा छ। एमालेमा साउन २ मा पोलिटब्यूरो र ५ मा केन्द्रीय कमिटी बैठक बस्ने तयारी छ।
-copy-1745411477.jpg)
-1746009348.jpg)
