गृह मन्त्रालयले त्रिभुवन अन्तर्राष्ट्रिय विमानस्थलको अध्यागमन कार्यालयका धेरै कर्मचारीको सरूवा गर्ने तयारी थालेको छ।
मंगलबार मात्र गृहले अध्यागमन विभागका प्रमुख, अध्यागमन कार्यालयका प्रमुखसहित पाँच जना सहसचिवहरूको सरूवा गरेको थियो।
अब ठूलो संख्यामा अध्यागमन कार्यालयका अधिकृतहरूको पनि सरूवा गर्ने तयारी रहेको गृहमन्त्रीको सचिवालय स्रोतले जनाएको छ।
'अध्यागमन कार्यालयका ४० देखि ४५ जना अधिकृतको सरूवा निस्किँदैछ। आज (मंगलबार) नभए भोलि (बुधबार) सम्म निस्किन्छ,' स्रोतले भन्यो।
उनीहरूका ठाउँमा भर्खरै लोक सेवा परीक्षा उत्तीर्ण भई सेवामा प्रवेश भएका अधिकृतहरूलाई पठाउने तयारी रहेको पनि उनले बताए।
'सुधारका लागि भनेर अब लोक सेवा पास भएर भर्खरै सेवामा आएकाहरूलाई त्यहाँ पठाउने तयारी भइरहेको छ,' उनले भने।
गृहले मंगलबार अध्यागमन विभागका महानिर्देशक गोविन्दप्रसाद रिजाललाई गृह मन्त्रालयमै सरूवा गरेको छ। त्यस्तै मन्त्रालयमा रहेका रामचन्द्र तिवारीलाई विभागको महानिर्देशकका रूपमा जिम्मेवारी दिएको छ।
अध्यागमन कार्यालयमा रहेका प्रमुख अध्यागमन अधिकृत विष्णुप्रसाद कोइरालाको पनि गृह मन्त्रालयमा सरूवा गरिएको छ। कोइरालाको अध्यागमनमा गएको ५४ दिनमै सरूवा भएको हो।
उनको ठाउँमा जिल्ला प्रशासन कार्यालय खोटाङमा प्रमुख जिल्ला अधिकारी रहेका नरहरि घिमिरेलाई प्रमुख अध्यागमन अधिकृत बनाइएको छ।
घिमिरेको ठाउँमा गृह मन्त्रालयबाट सहसचिव कल्पना श्रेष्ठलाई प्रमुख जिल्ला अधिकारीका रूपमा पदस्थापन गरिएको छ।
-copy-1745411477.jpg)
-1746009348.jpg)
