काठमाडौं महानगरपालिकाका नगर सभा सदस्य सन्तोष ढुंगेलले मेयर बालेन शाहलाई बोल्ने मात्र हो कि काम पनि गर्ने हो भन्दै प्रश्न गरेका छन्।
बुधबार राष्ट्रिय सभा गृहमा नगर सभाको १७ औं अधिवेशनको दोस्रो बैठकमा आफ्नो धारणा व्यक्त गर्दै उनले उक्त प्रश्न गरेका हुन्।
'काठमाडौं महानगरको प्रथम मेयरको (पिएल सिंह) शालिक राष्ट्रिय सभा गृह अगाडि बनाउँछु भन्नुहुन्थ्यो,' उनले प्रश्न गरे, 'हजुरले पनि बोलेर मात्रै सकाउने हो कि काम पनि गर्ने हो? त्यो बुझिनँ।'
यस्तै उनले ढुंगामाटोको घरको समेत नक्सा पास हुने/ गराउने प्रावधान बनाउनुपर्ने बताए।
'गरिब काठमाडौंबासी पनि होलान्। गरिब काठमाडौंबासीले आफ्नो घर ढुंगामाटोले बनाउन चाहे भने किन हामीले त्यो प्रावधान निकाल्न सक्दैनौं? ढुंगा माटोले घर बन्दैन?,' उनले प्रश्न गरे।
नगर सभा सदस्य ढुंगेलले अमूर्त सम्पदा सबै ढुंगामाटोले बन्ने भएपछि महानगरमा ढुंगामाटोको घर बनाएर समेत बस्न पाउने व्यवस्था लागू गर्न जोड दिए। त्यसैले ढुंगामाटोको घर बनाएर बस्नलाई नक्सा पास हुने प्रावधान नभएको हुँदा त्यसबारे प्रावधान व्यवस्था गर्नुपर्ने उनको जोड थियो।
यस्तै, विद्यालयहरूलाई सटर हटाउन लगाएर दिने भनेको रकम छ महिना बित्दासमेत महानगरले प्रदान नगरेको उनको गुनासो छ।
महानगरमा कतियप सामुदायिक विद्यालयले सटर भाडामा दिएर आम्दानी गरी स्रोत व्यवस्थापन गर्दै विद्यालय सञ्चालन गर्दै आएको थियो। महानगरले भने विद्यालयका सटरहरू भाडामा लगाइ व्यवसाय सञ्चालन गरेको र त्यसो गर्न नपाइने भन्दै सबै सटहरू खाली गर्न लगाएको थियो। कतिपय विद्यालयले सटरको आम्दानी नहुँदा स्रोत व्यवस्थापन गर्न कठिन हुने राय व्यक्त गरेका थिए। तर महानगरले मूल्यांकन र अध्ययन गरी छ महिनाभित्र विद्यालय व्यवस्थापनका लागि बजेट दिने प्रतिबद्धता व्यक्त गरेको थियो।
-copy-1745411477.jpg)
-1746009348.jpg)
