राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष रवीन्द्र मिश्रले मौनता तोडेका छन्।
पार्टी अध्यक्ष राजेन्द्र लिङ्देनले उपाध्यक्ष मुकुन्दश्याम गिरी, अनुशासन समिति अध्यक्ष नवराज सुवेदी र प्रवक्ता सगुनसुन्दर लावतीलाई पदमुक्त गरेपछि मतभेद बढिरहेका बेला वरिष्ठ उपाध्यक्ष मिश्र मौन थिए।
चैत १५ गते काठमाडौंको तीनकुने घटनापछि प्रहरीले उनलाई पक्राउ गरी मुद्दा चलाएको थियो। सर्वोच्च अदालतले रिहा गर्न आदेश दिएपछि उनी हिरासतबाट ४९ दिनपछि हाजिरी जमानीमा छुटेका थिए।
त्यसपछि मिश्र पार्टीका बैठकहरूमा सहभागी रहे पनि सार्वजनिक कार्यक्रमहरूमा देखिएका छैनन्, अभिव्यक्तिसमेत दिएका थिएनन्।
असार २५ र साउन २ गते अध्यक्ष लिङ्देनले पार्टीभित्रका मनोनीत नेताहरूलाई पदमुक्त गरेका छन्। जसको विरोधमा पार्टीकै केही पदाधिकारीहरूले एकपछि अर्को विज्ञप्ति जारी गरेर अध्यक्षलाई विधानविपरीत काम नगर्न भनिरहेका छन्। तर मिश्र यसप्रति मौन थिए।
करिब तीन वर्षअघि विवेकशील साझा पार्टी छाडेर मिश्रसहित ४० जना राप्रपामा समाहित भए पनि राप्रपाले उनीहरूको नाम निर्वाचन आयोगमा अझै अद्यावधिक गरिदिएको छैन।
यस्तो अवस्थामा मिश्रले बुधबार सामाजिक सञ्जाल एक्समा लेखेका छन्, ‘...देशमा प्रमुख नेताहरूले धेरै विवाद र संकट भयो भने सार्वजनिक रूपमा बोल्नुपर्छ। तर देशका प्रमुख नेताहरूले पार्टीभित्र धेरै विवाद र संकट भयो भने सार्वजनिकरूपमा धेरै बोल्नु हुँदैन।’
उनले पार्टीभित्र मतभेद रहेको अवस्थातर्फ लक्ष्य गर्दै यस्तो बेला धेरै बोल्न नहुने उल्लेख गरेका छन्।
‘म देशको प्रमुख नेता होइन तर पदीयरूपमा पार्टीको एक जना प्रमुख नेता हुँ। त्यसैले म अत्यावश्यक नभई बोल्दिनँ। सबैले एकैपटक बोल्नु पर्दैन। नबोल्नुलाई डराएको भनेर कसैले सोचेको छ भने त्यसको मूल्य महँगो पर्न सक्छ,’ मिश्रको भनाइ छ।
यो पनि:
रवीन्द्र मिश्र मौन बस्नुको रहस्य: राप्रपाले उनीसहित ४० जनाको नाम नै निर्वाचन आयोगमा गरिदिएन अद्यावधिक
राप्रपामा गम्भीर मतभेद, रवीन्द्र मिश्र मौन
लिङ्देनले किन खोसे राप्रपा नेताहरूको पद?
-1753341424.jpeg)
-1746009348.jpg)
