बागमती प्रदेश सरकारमा रहेका नेपाली कांग्रेसका चार जना मन्त्रीले पदबाट राजीनामा दिएका छन्।
आन्तरिक मामिला तथा कानुन मन्त्री सुरजचन्द्र लामिछाने, युवा तथा खेलकुद मन्त्री मीनकृष्ण महर्जन, पर्यटन मन्त्री विमल ठकुरी र सहकारी मन्त्री मधुकुमार श्रेष्ठले शुक्रबार राजीनामा दिएका हुन्।
कांग्रेसका चार जना मन्त्रीले राजीनामा दिएको युवा तथा खेलकुद मन्त्री मीनकृष्ण महर्जनले सेतोपाटीलाई बताए।
बागमतीमा कांग्रेस संसदीय दल नेता बहादुर सिं लामा मुख्यमन्त्री छन्।
मुख्यमन्त्री लामालाई पदबाट राजीनामा दिन सभापति शेरबहादुर देउवाले केही समयदेखि नै आग्रह गरे पनि मुख्यमन्त्री लामाले अस्वीकार गर्दै आएका थिए। गत बुधबार पनि मुख्यमन्त्री लामालाई बोलाएर सभापति देउवाले राजीनामा दिन सुझाव दिएका थिए।
मुख्यमन्त्री लामाले आधा-आधा कार्यकाल मुख्यमन्त्री बन्ने भन्ने पूर्वसहमति तोडेर सम्पर्कविहीन भएको आरोप लागेको छ। सरकार बनेको एक वर्षपछि पद छाड्ने पूर्वसहमति मुख्यमन्त्री लामाले अस्वीकार गरेको आरोप छ।
‘हामीले ह्वाटस्एपमार्फत् राजीनामा पठायौं, फोन गरेर पनि जानकारी गराइसकिएको छ,’ महर्जनले भने, ‘मुख्यमन्त्रीकै हातमा राजीनामा दिन भने पाइएन।’
उनकाअनुसार यहाँ कांग्रेसले सांसद ईन्द्रबहादुर बानियाँको नेतृत्वमा नयाँ सरकार बनाउन खोजेको छ।
बानियाँ कांग्रेस बागमती प्रदेश सभापति पनि हुन्।
‘मुख्यमन्त्रीले आधा-आधा कार्यकाल भन्ने पूर्वसहमति मान्नुभएन। अब यहाँ सेट परिवर्तन हुन्छ, मुख्यमन्त्रीले राजीनामा नदिए अविश्वास प्रस्ताव दर्ता गर्छौं,’ महर्जनले भने, ‘मुख्यमन्त्रीको राजीनामा आओस् भनेर दबाब दिन हामीले राजीनामा पनि दियौं।’
बागमतीका आर्थिक मामिला तथा योजना मन्त्री कुन्दनराज काफ्लेले ल्याएको बजेटमाथि पार्टीभित्रै असन्तुष्टि छ भने अन्य दलहरूले पनि विरोध गरेका छन्।
असार १६ गतेदेखि २३ गतेसम्म चलेको कांग्रेस केन्द्रीय कार्यसमिति बैठकमा पनि बागमतीको बजेटबारे कुरा उठेको थियो। अराजक शैलीमा बजेट ल्याइएको भन्दै केन्द्रीय सदस्यहरूले आलोचना गरेका थिए।
‘अराजक ढंगले जानुभन्दा मन्त्रिमण्डल नै पूरै परिवर्तन गरेर जान खोजिएको हो,’ महर्जनले भने।
बागमतीमा संसदीय दल नेता पनि परिवर्तन गरिने महर्जनको भनाइ छ।
२०७९ पुस १३ गते भएको संसदीय दल नेता निर्वाचनमा हेटौंडाका ईन्द्रबहादुर बानियाँलाई ५ मतान्तरले हराउँदै नुवाकोटका लामा संसदीय दल नेता निर्वाचित भएका थिए। बानियाँले १६ मत ल्याएका थिए भने लामाले २१ मत ल्याएका थिए।
बानियाँ र लामा त्यसबेला संस्थापन पक्ष (सभापति शेरबहादुर देउवानिकट) नै थिए। तर संसदीय दल नेतामा समर्थन नपाउने अवस्था बनेपछि बानियाँले संस्थापनइतर समूहको साथ पाए तर जित्न सकेनन्। उनलाई त्यसबेला नेता शेखर कोइराला र महामन्त्री गगन थापाको साथ थियो।
अहिले ईन्द्रबहादुर बानियाँलाई संसदीय दल नेता बनाउन २१ जना सांसदहरूले हस्ताक्षर गरेका छन्। हस्ताक्षर गर्ने सांसदहरू सभापति देउवा, महामन्त्री गगन थापा र पूर्वमहामन्त्री प्रकाशमान सिंहनिकट सांसदहरू हुन्।
‘२१ जना सांसदहरूले प्रदेश सभापति ईन्द्रबहादुर बानियाँको नेतृत्वमा कांग्रेस बागमती प्रदेश संसदीय दल अघि बढ्नुपर्छ भन्नुभएको छ, हस्ताक्षरसमेत गर्नुभएको छ, त्यसैले हामीले संसदीय दल नेताविरूद्ध अविश्वास प्रस्ताव दर्तासमेत गरेका छौं,’ बानियाँले भने, ‘यो संसदीय दलको कुरा हो, यसको प्रक्रिया टुंगिएपछि बल्ल सरकारको कुरा हुन्छ।’
उनीहरूले सांसदहरूको हस्ताक्षर संसदीय दलका सचिव कृष्ण तामाङलाई बुझाएका छन्।
संसदीय दल नेतासमेत रहेका मुख्यमन्त्री लामाले प्रभावकारी काम नगरेको पार्टीलाई महसुस भएकोसमेत उनले बताए।
बागमतीमा कांग्रेसका ३७ जना सांसद छन्।
बागमतीमा कांग्रेसले एमालेसँग मिलेर सरकार बनाएको हो।
मुख्यमन्त्री लामाले भने एक वर्षमै सरकारको नेतृत्व छाड्दा सन्देश राम्रो नजाने कुरा सभापति देउवासँग राखेको उनीनिकट सांसदहरू बताउँछन्।
एक वर्षमै मुख्यमन्त्री छाड्ने हो भने अरू प्रदेशमा पनि त्यो कुरा लागू हुनुपर्ने जिकिर उनले गरेका थिए।
यी हुन् मुख्यमन्त्री लामाविरूद्ध हस्ताक्षर गरेका सांसदहरू:
१. ईन्द्रबहादुर बानियाँ
२, शिवराज अधिकारी
३. कञ्चनचन्द्र बादे
४. दीपेन्द्र श्रेष्ठ
५. पुकार महर्जन
६. विनु रायमाझी पौडेल
७. यमुनादेवी श्रेष्ठ
८. माया श्रेष्ठ
९. उर्मिला नेपाल
१०. शान्ता ढकाल
११. प्रभात तामाङ
१२. छिरीङ दोर्जे लामा
१३. मीना पराजुली
१४. याङ्गकिला शेर्पा
१५. मीनकृष्ण महर्जन
१६. बिमल ठकुरी
१७. मदुकुमार श्रेष्ठ
१८. सुरजचन्द्र लामिछाने
१९. सुरेश श्रेष्ठ
२०. श्रीराम लामिछाने
२१. सुना परियार।
-1753341424.jpeg)
-1746009348.jpg)
