नेपाली कांग्रेस बागमती प्रदेश संसदीय दल नेताको हैसियत गुमाएपछि मुख्यमन्त्री बहादुर सिं लामा तामाङले आफूविरूद्ध मन्त्रीहरू र नेताहरूले प्रपञ्च गरेको आरोप लगाएका छन्।
आफूले सहमतिमै लैजाने प्रयास गरे पनि मन्त्रीहरू र नेताहरूले भित्रभित्र प्रपञ्च गरेको देखिएको उनको भनाइ छ।
मंगलबार हेटौंडामा बसेको संसदीय दल बैठकमा दल नेता तामाङका पक्ष र विपक्षमा रहेका सांसदहरूको मतविभाजन गरिएको थियो।
लामाका पक्षमा १५ जनाले मात्रै मत दिए भने सांसद ईन्द्रबहादुर बानियाँका पक्षमा २२ जना उभिए। बागमतीमा कांग्रेसका ३७ जना सांसद छन्।
बागमती कांग्रेसमा अहिले संसदीय दल नेता रिक्त भएको अवस्था छ। त्यसका लागि भोलि निर्वाचन हुनेछ।
मुख्यमन्त्री तामाङ नै दल नेता उठ्छन् कि उनको पक्षबाट अरू कोही सांसदलाई उम्मेदवार बनाउँछन् यकिन छैन। तर अर्को पक्षबाट भने ईन्द्र बानियाँ संसदीय दल नेताको प्रतिस्पर्धी हुन्।
दल नेताको हैसियत गुमाएका मुख्यमन्त्री तामाङले पत्रकारहरूसँग कुराकानी गर्दै मुख्यमन्त्रीबाट राजीनामा नदिने बताए।
‘मुख्यमन्त्री हुन दल नेता हुनुपर्छ भन्ने कानुनी व्यवस्था छैन,’ उनले भने, ‘अहिले दल नेता रिक्त भएको अवस्था छ, मुख्यमन्त्रीबाट भने म राजीनामा दिन्न।’
संसदीय दल र सरकार फरक विषय भएको उनले बताए। ‘दल नेता नहुँदैमा मुख्यमन्त्रीबाट हटाउन सक्ने व्यवस्था छैन,’ उनले भने।
आफूमाथि विभिन्न आरोप लगाइएको भन्दै उनले यसले कांग्रेसलाई फाइदा नपुग्ने दाबी गरे। ‘मेरै पाँच जना मन्त्री र नेताहरू पनि प्रपञ्चमा रहेछन्, नेताहरू यसरी लाग्नु राम्रो पनि होइन,’ उनले भने, ‘लोकतान्त्रिक विधिअनुसार संसदीय दल नेता छान्ने विधि प्रयोग हुन्छ। दल नेता खाली भयो।’
उनले गठबन्धन सरकार रहेको र मुख्यमन्त्री हुन दल नेता हुन आवश्यक नरहेको पनि बताए। कांग्रेसमा प्राय: संसदीय दल नेता मुख्यमन्त्री तथा प्रधानमन्त्री रहने परम्परा छ।
यो पनि: बागमतीमा कांग्रेसले किन ढाल्न लाग्यो आफ्नै सरकार?
-1746009348.jpg)
