भारतको महाराष्ट्रमा सेनाका एक जना अधिकृतले चलाएको गाडीले २५ देखि ३० जनालाई ठक्कर दिएको छ।
आइतबार बेलुकी साढे ८ बजे नागपुरको नगरधन नजिकै दुर्गा चोक हुँदै हमलापुरी जाँदै गरेको गरेको गाडी भारतीय सेनामा कार्यरत ४० वर्षीय हर्षपाल महादेव वाघमारेले चलाएका थिए।
सो गाडी तीव्र गतिका कारण अनियन्त्रित हुँदा सडकमा हिँडिरहेका २५ देखि ३० जना पैदलयात्रीलाई ठक्कर दिएर नालामा खसेको भारतीय अनलाइन एनडिटिभीले लेखेको छ।
एनडिटिभीका अनुसार उनी मदिराको नसामा लठ्ठ थिए।
दर्जनौं मानिसहरूलाई ठक्कर दिएर गाडी नालामा खसेपछि वरपरबाट ठूलो संख्यामा मानिसहरू जम्मा भएका थिए।
त्यसपछि त्यो भिडले गाडी चलाइरहेका सेनाका अधिकारीलाई त्यहाँबाट निकालेर कुटपिट गरेका थिए।
स्थानीयहरूको ठूलो समूहले गाडीबाट थुतेर आक्रमण गर्दा उनी घाइते भएको एनडिटिभीले जनाएको छ।
सामाजिक सञ्जालमा सार्वजनिक भएका भिडियोहरूमा उनलाई रगतले लतपतिएको अनुहारसहित भीडबाट उम्कन खोज्दै गरेको देखिन्छ।
उनलाई प्रहरीले उद्धार गरी अस्पताल पुर्याएको थियो।
घटनामा धेरै मानिसहरू घाइते भएको र उनीहरूको उपचार भइरहेको छ।
प्रहरीले घटनाबारे थप अनुसन्धान अघि बढाएको जनाएको छ।
-1746009348.jpg)
