राष्ट्रिय स्वतन्त्र पार्टी (रास्वपा) को सचिवालय बैठक मंगलबार दिउँसो बस्दैछ।
दिउँसो तीन बजे पार्टी केन्द्रीय कार्यलयमा बस्ने बैठकमा छलफलका लागि ६ वटा कार्यसूची तय गरिएको छ।
बैठकमा समसामयिक राजनीतिक एवं पार्टी गतिविधिबारे छलफल हुने रास्वपाले जनाएको छ।
यससँगै भैरहवामा बसेको संसदीय दलको बैठकबारे सचिवालयलाई जानकारी दिइने प्रवक्ता मनिष झाले बताए। यस्तै रूपन्देही–३ को उपचुनावको तयारीबारे पनि सचिवालयमा ब्रिफिङ गर्ने तयारी छ।
रास्वपाको सुदूरपश्चिम प्रदेश समस्या समाधान गर्न गठित कार्यदलको प्रगतिबारे पनि बैठकलाई जानकारी गराइने झाले बताए।
आजको बैठकमा विधान व्याख्या (अनुशासन आयोगको प्रयोजनको लागि) अनुमोदनबारे पनि छलफलको कार्यसूची तय गरिएको छ।
बैठकमा रूपन्देही उपनिर्वाचन प्रयोजनको लागि निर्वाचन आयोगमा दल दर्ता गर्ने सम्बन्धमा पनि छलफल हुने उनले बताए।
सचिवालय बैठकमा प्रतिनिधिसभा सदस्य समानुपातिक निर्वाचन सूचीबाट नाम हटाउनेसम्बन्धी निवेदनबारे पनि छलफल हुने झाले बताए।
रास्वपाले अन्तर्राष्ट्रिय युवा दिवसका अवसरमा ‘फ्युचर लिडर्स समिट’ आयोजना गर्दैछ। त्यसबारे पनि छलफल गर्ने कार्यसूची छ।
विधिध प्रस्तावअन्तर्गत भिजिट भिसा प्रकरण छानविन समितिको म्याद थप, केन्द्रीय समिति बैठक र प्रस्तावित विषयहरूबारे छलफल हुनेछ।
रणनीतिक समूहहरू गठन, विभाग प्रमुख नियुक्त गर्ने, विदेशमा रहेका नेपालीहरूलाई मताधिकारको व्यवस्था गर्न दबाब दिने अभियान र सभापति रवि लामिछानेको न्यायका लागि चलाइरहेको हस्ताक्षर अभियानलाई प्रभावकारी बनाउनेबारे आजको बैठकमा छलफल हुने उनले बताए।
-1746009348.jpg)
