अमेरिकी राष्ट्रपति डोनाल्ड ट्रम्प सरकारले अमेरिका भ्रमणका लागि हाल भिसा लिएका ५ करोड ५० लाख विदेशीहरूको छानबिन गर्ने भएको छ।
अमेरिकी विदेश मन्त्रालयले एक विज्ञप्ति निकाल्दै भिसा अवधिभन्दा बढी अमेरिकामा बसेको वा आतंकवाद लगायत आपराधिक गतिविधिमा संलग्न भएका लगायतलाई देश निकाला गर्नका लागि ध्यानपूर्वक जाँच गर्ने बताएको छ।
प्रहरी प्रशासन वा अध्यागमन अभिलेखहरू वा भिसा जारी गरेपछि प्रकाशमा आउने सबै जानकारीको जाँच प्रक्रियाको समीक्षा गरिने मन्त्रालयले जनाएको छ।
अवैध आप्रवासीको मुद्दा उछालेर दोस्रो कार्यकाल जितेका ट्रम्पले अध्यागमनमाथि कडा कारबाही गरेका छन्। सुरूमा उनको ध्यान अवैध आप्रवासीमा थियो। अब भने भिसा लिएर कानुनी रूपमा बसिरहेका विदेशीहरू माथि पनि उनले निशाना लगाएका हुन्।
अमेरिकाले सन् २०२४ को आर्थिक वर्षमा स्थायी बसोबास वा 'ग्रीन कार्ड' बाहेक लगभग १ करोड १० लाख विदेशीलाई अस्थायी भिसा जारी गरेको थियो। त्यसमध्ये लगभग ७७ प्रतिशत व्यवसाय वा पर्यटनका लागि थिए, भने करिब सात प्रतिशत विद्यार्थी वा भ्रमणमा आएका शिक्षाविद् र उनीहरूका परिवारलाई जारी गरिएको थियो।
कतिपयलाई दिइने यस्ता भिसा वर्षौंसम्मका पनि हुनाले सबैको ध्यानपूर्वक जाँच गर्न धेरै समय लाग्ने र खर्चिलो हुनेछ।
ट्रम्प सरकारले यसअघि नै अमेरिका अथवा इसराइलका यहूदी विरोधी पोस्ट गरेको छ कि भनेर भिसावाहकको सामाजिक संजालको निगरानी गर्न थालिसकेको छ। यो सरकारले पहिलेका सरकार भन्दा उसै पनि आप्रवासीबारे धेरै जानकारी संकलन गरिरहेका छ। पछिल्लो निर्णय पछि यो क्रम झन् धेरै बढ्नेछ।
अमेरिकी विदेश मन्त्री मार्को रुबियोले तत्काल व्यावसायिक ट्रक चालकहरूका लागि नयाँ भिसा जारी गर्न रोकेको घोषणा गरे लगत्तै सरकारले यो निर्णय गरेको हो।
भर्खरै विदेश मन्त्रालयले भिसाको म्याद नाघेको र अन्य कानुनी उल्लंघन गरेको भन्दै लगभग ६ हजार विद्यार्थीको भिसा रद्द गरेको घोषणा गरेको थियो।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1746009348.jpg)
