काठमाडौं महानगरका मेयर बालेन शाहले प्रधानमन्त्री केपी शर्मा ओलीलाई चीन भ्रमणमा लिपुलेकबारे कुरा उठाउन आग्रह गरेका छन्।
प्रधानमन्त्री ओली शनिबार चीन प्रस्थान गरेपछि फेसबुकमा स्ट्याटस लेख्दै मेयर बालेनले भ्रमण क्रममा लिपुलेक नेपालको हो भन्ने विषय चीनलाई सम्झाउन आग्रह गरेका हुन्।
‘नेपालको लिपुलेक नाकाबाट व्यापार पुनः सञ्चालन गर्ने भारत-चीनको सहमतिले हाम्रो सार्वभौमिकतामाथिको अतिक्रमण गरेको छ, त्यो हाम्रो नै हो भन्ने कुरा चीनलाई सम्झाउन नबिर्सनु होला,’ मेयर बालेनले लेखेका छन्।
उनले प्रधानमन्त्रीको चीन भ्रमणको शुभकामना दिँदै ती विषय उठान हुनेमा विश्वस्त रहेको पनि बताए।
‘हामीलाई तपाईं माथी पूर्ण विश्वास छ,’ उनले लेखेका छन्।
प्रधानमन्त्री केपी शर्मा ओली शनिबार बिहान ७ बजे चीन प्रस्थान गरिसकेका छन्।
सांघाई कोअपरेसन अर्गनाइजेसनको शिखर सम्मेलनमा भाग लिन प्रधानमन्त्री ओली नेपाली प्रतिनिधिमण्डलको नेतृत्व गर्दै चीन गएका हुन्।
पाँच दिने भ्रमणका क्रममा चिनियाँ राष्ट्रपति सी चिनफिङ नेतृत्वको प्रतिनिधिमण्डलसँग द्विपक्षीय भेटवार्ता हुने कार्यक्रम पनि तय छ।
यसबीचमा चीन र भारतले लिपुलेक मार्ग भएर व्यापार गर्ने सम्झौता गरेका थिए।
नेपालको भूमि अतिक्रमण गरी चीन र भारतले व्यापार गर्ने सहमति गरेपछि संसददेखि सडकसम्म त्यसको विरोध हुँदै आएको छ।
परराष्ट्र मन्त्रालयले ती भूभाग नेपालको अभिन्न भूभागको रूपमा रहेको भनेर विज्ञप्ती जारी गरेर प्रष्ट पारिसकेको छ। त्यसपछि भारतीय विदेश मन्त्रालयले पनि विज्ञप्ती जारी गर्दै लिपुलेकमा नेपालको दाबी नपुग्ने बताएको थियो।
यसबारेमा विभिन्न राजनीतिक दल र सांसदहरूले पनि चीन भ्रमणका क्रममा कुरा गर्न प्रधानमन्त्री ओलीलाई सुझाएका छन्।
-1755241369.jpg)
-1746009348.jpg)
