बाढीपहिरोले अवरूद्ध भएको ८ वटा सडक सरकारले तत्काल मर्मत गरी खुलाउने भएको छ।
यी सडकहरू खुलाउन कार्यवाहक प्रधानमन्त्री प्रकाशमान सिंहले आइतबार बैठक राखेर आवश्यक निर्देशन दिएका हुन्।
सहरी विकास मन्त्रालयमा भएको बैठकमा सिंहले सडक अवरूद्ध हुँदा नागरिकलाई समस्या भएकोले तत्काल मर्मत गर्न आग्रह गरेको उनको सचिवालयले जनाएको छ।
बैठकमा गृह मन्त्रालय अन्तर्गतको विपद् पूर्वतयारी प्रतिकार्य शाखाले वर्षाका कारण अवरुद्ध भएका सडकहरूबारे तयार गरेको विवरण प्रस्तुत गरेको थियो।
हाल पासाङ ल्हामु राजमार्गअन्तर्गत रसुवा गोसाइकुण्ड गाउँपालिका २ टिमुरे, अरनिको राजमार्गअन्तर्गत भोटेकोशी गाउँपालिका २ को दारी र घट्टेखोला, बेनि जोमसोम सडक खण्डअन्तर्गत रघुगंगा गाउँपालिका दुई खोलीमा सडक अवरूद्ध छ।
घोराही थवाङ शहीद मार्गअन्तर्गत त्रिवेणी गाउँपालिका, भेरी करिडोरअन्तर्गत त्रिपुरासुन्दरी नगरपालिका छलघाट, कर्णाली राजमार्गअन्तर्गत शुभकालिन गाउँपालिका र भेरी करिडोर अन्तर्गत आठविसकोट नगरपालिकामा सडक अवरुद्ध छ।
कार्यवाहक प्रधानमन्त्री सिंहले विपद्सम्बन्धी पूर्वसतर्कताका लागि यसअघि म्यासेज पठाउने गरिएकोमा अबदेखि 'भ्वाइस कल' पनि गर्ने व्यवस्थाका लागि आवश्यक व्यवस्था मिलाउन आग्रह गरेका छन्।
-1746009348.jpg)
