नेकपा (एमाले) को सचिवालय बैठक बिहीबार दिउँसो ३ बजे बस्दैछ। पार्टी केन्द्रीय कार्यालय च्यासलमा बस्ने बैठकमा विधान महाधिवेशनमा प्रस्तुत हुने प्रतिवेदनमाथि छलफल हुनेछ।
शुक्रबारबाट ललितपुरको गोदावरीस्थित सनराइज हलमा सुरू हुने बैठकमा प्रस्तुत हुने राजनीतिक, सांगठनिक, विधान संशोधन र केन्द्रीय आयोग (निर्वाचन, लेखा, आर्थिक लगायत) हरूका प्रतिवेदनमाथि छलफल हुने र पारित गर्ने कार्यसूची छ।
यसअघि केन्द्रीय कमिटी बैठक बोलाएर यी प्रतिवेदन पारित गर्ने तयारी भए पनि समय अभावलाई कारण देखाउँदै बैठक स्थगित गरिएको थियो।
यसैबीच आज बस्ने सचिवालय बैठकमा उपाध्यक्षद्वय सुरेन्द्र पाण्डे, युवराज ज्ञवाली र स्थायी कमिटी सदस्य कर्ण थापाको फरक मतबारे पनि छलफल हुनेछ। तीनै जना नेताले विद्या भण्डारीलाई पार्टीमा फर्कन रोक लगाउने केन्द्रीय कमिटीको निर्णयविरू नोट अफ डिसेन्ट (फरक मत) राखेका थिए।
‘केन्द्रीय कमिटी बैठकमा केही फरक मतहरू फरक मतका रूपमा प्रकट भयो भन्ने तपाईंहरूले थाहा पाइसक्नुभएको छ। फरक मतका रूपमा दुई जना उपाध्यक्ष, युवराज ज्ञवाली र सुरेन्द्र पाण्डेले पूर्वराष्ट्रपति पार्टी राजनीतिमा फर्कनु हुँदैन र उहाँको सदस्यता नवीकरण गर्ने कुरा अस्वीकार गर्नुपर्दछ भन्ने विषयमाथि असहमति राख्नुभएको छ। कसलाई सदस्यता दिने वा नदिने भन्ने विषय दस्तावेजको विषय होइन, त्यसकारण त्यो विषय दस्तावेजको फरक मत हो कि होइन भन्ने अर्थमा जिज्ञासा हो भने दस्तावेज माथिको फरक मत होइन,’ महासचिव शंकर पोखरेलले बुधबार भनेका थिए, ‘निर्णयमाथिको फरक मत हो। निर्णयमाथिको फरक मत विधानतः अधिवेशनमा छलफल गर्ने कि, राष्ट्रिय महाधिवेशनमा छलफल गर्ने भन्ने विषय सचिवालय बैठकले निरूपण गर्ला, किनकि, कुनै विन्दुमा राष्ट्रिय महाधिवेशन निर्णयहरूका सन्दर्भमा छलफल गर्न पाइन्छ।’
-1746009348.jpg)
